O o tatou tagata e talenia ma fiafia tele i taaloga, aemaise lava le paia ma le mamalu ua faamanuiaina ma aumau i atunuu i fafo.
O le ala foi lea na afisi limalua ai e le susuga i le faafeagaiga ia Penaia Te‘o se avanoa ina ua talosaga ane le City Council pe mafai ona ia faamaopoopoina se kalapu lakapi ae o latou faatupeina. Na ta‘ua e Penaia, o le masina o Iulai i le tausaga na tea nei na amata fai mai ai fesootaiga ma le Council.
Manatua foi o le taimi tonu lea na faatoilaloina ai e le Manu Samoa le au tele a Ausetalia. Sa lavelave ma faigata le amataga, peitai e faafetai le komiti faafoe ua iai nei i le lagolago atu a Samoa, aemaise o isi kalapu lakapi mai nuu tuaoi, faapea foi nai tagata o taumafaia lenei taaloga i Melepone.
Ua faamatuuina mai nei e le Council le paka lea o le a fai ai le malae lakapi, o i foi lea o le a fai ma nofoaga autū o le kalapu, ma o se taimi o le masina o Mati ua faamoemoe e faatutuina ai goal post, ae o le aso 15 o le masina nei o le a amata ai toleniga, lea o le a mafai ona fesoasoani mai ai ma le kalapu tele a Vitoria, le Rebels.
O le masina foi o Mati o le a amata ai semina e a‘oa‘oina ai tagata e fia avea ma faiaoga.
O le komiti faafoe ua iai nei o loo peresitene ai le susuga ia Penaia Te‘o, ae lagolagosua nisi o papalagi e fiafia ma talenia i le taaloga.
Saunoa le komiti, ua feololo nai suafa o alo ma fanau ua resitalaina mo le kalapu.
O le tatalo a la tatou tautua, ia tau lau o le faamoemoe, ia faaeaina ni tamafanau mai le Brimbank Rugby Club Melbourne.
