Ua taoto nei i le tala faatatau autū o le tupe mulimuli a le faigamalo a le HRPP se siitaga o totogi o tagata faigaluega a le Malo e 9 tesimale 7 pasene mo tagata faigaluega o loo maua le totogi e 40 afe i le tausaga faasolo ifo i lalo.
O le aufaigaluega i luga atu e oo i Pule Sili o Matagaluega ma faalapotopotoga a le Malo o loo maua le 50, 60 ma le 80 afe faapea le selau afe i le tausaga, e 2 pasene le siitaga faaopoopo i o latou totogi.
Faaalia e le Minisita o Tupe, le susuga ia Niko Lee Hang i lana saunoaga o le tala autū o le tupe 2010 i le 2011, ua silasila le Malo i mafatiaga o feagai ma le atunuu i le siitia o le tau o le soifuaga faaopoopo i ai ma aafiaga mai le sunami, ua manatu ai ua tatau ona faatino se siitaga o totogi.
O le aso muamua o le masina fou o Iulai o le a amata faamamalu ai lea siitaga fou.
Ua faailoa mai foi i le tala autū o le tupe le siitia i le 4 pasene o le penisione mo tamā ma tina matutua o le atunuu ua silia i le 65 tausaga o le soifua, lea o le a maua le $130 tala i le masina faatusa i le 125 o loo iai i le taimi nei. Ua ave pea le faamuamua a le Malo i le soifua maloloina ma a‘oa‘oga i vaegatupe faatatauina mo le siitia o ia vaega, aemaise o le faaopoopoina o seleni mo le atinae o tagata tafafao ma pisinisi.
O A‘oga e $85.42 miliona ua fuafua e ave i ai, lea e aofia ai ma le vaegatupe e 5 miliona e tuafatufa i a‘oga tuma‘oti ma a‘oga a ekalesia.
O le soifua maloloina e $64.89 miliona ma o se siitaga e 10 pasene ua siitia ai tupe faatatauina mo lea matagaluega a le Malo.
O Faatoaga ua fuafua e faaalu ai le vaegatupe e $12.33 miliona ma e 9 pasene ua siitia ai tupe mo lea matagaluega. Ua aofia ai ma se vaegatupe e tusa ma le $150,000 mo le polokalame o le totōina o le koko ma le kofe.
O le vaega o le eletise ua fuafua e ave i ai le 9.7 miliona.
O le suavai ma vai lafoai e 8.91 miliona mo le pulega o le suavai auā galuega e mautinoa ai le maua e tagata uma o le suavai mamā.
O le $3.41miliona o le a faaaogā e le pulega e faatino ai galuega mo tagata lautele. E $746 miliona (746.901,013) ua fuafua e faaaluina mo atinae o le tala autū o le tupe mo le tausaga faaletupe 2010/2011.
O le vaiaso nei e amata i le Aso Gafua, 7 o Iuni o le a talanoaina ai e le Palemene le tala autū o le tupe mulimuli a le faigamalo o iai nei.
