Mo le uluai taimi ua faaofi ai le fautasi o Magiagi i faagatama o le Tai mo lenei Tutoatasi ua manumalo ai i le tulaga tolu.
O le tulaga muamua ma le tulaga lua o Tuuga Fautasi Foe Laau, na suipi ai le afioaga o Faleu Manono. E pei lava ona vaaia i tausaga ua tuanai, o Aiga i le Tai lea lava e manumalo i le tele o tausinioga nei.
E leai foi la se eseesega o lenei tausaga, lea na sola ai le Fetu o le Moana I ma le manumalo ae tulaga lua ai le isi fautasi o Faleu Manono, le Fetu o le Moana II.
E ui i lea o le tulaga tolu na amata o tauva mai ai le Little Rina, se tasi o sa ua tele tausaga o tausinio i Faagatama o le Tai mai i le afioaga o Apia, ma le Tama o le Lupe, lea na faafoeina e taulelea o le afioaga o Magiagi.
O le masina o Aperila na oo atu ai i le afioaga le kapeteni, o Pauli Ivan Williams, o se alii sa faapea foi ona i auvaa a Manono auā le sailiga o ni alii o le aulakapi a Magiagi mo le faafoeina o lana fautasi. E toafā ni taulelea mai Manono na o latou aga‘i faatasi atu i le afioaga.
O Pauli o se tasi ua tele tausaga o taalo i le aulakapi a le Lupe o le Soaga i Magiagi ma o le fesootaiga lea na toe foi ane ai i tama o le Lupe mo se auvaa.
E lei maua le aulakapi ona o le taimi lea o loo vevela foi taamilosaga lakapi i le atunuu ma na ave i ai le faamuamua a le aulakapi a le afioaga.
O lea na aga‘i ai loa lenei alii i taulelea o le nuu e lē o i totonu o le aulakapi ae o loo iai le taimi e alo ai le sā lenei, ma e talu ai o se tasi lenei o afioaga toatele ona tupulaga e lei faigata le sailiga.
Mai le masina o Aperila na amata ai loa toleniga a le ‘au ina ia faamasani tupulaga i le fautasi ma na vaaia foi nisi o ta‘ita‘i o le afioaga aemaise alii ma faipule o le nuu ma faafeagaiga ua lagolago uma i toleniga a le auvaa.
E sosoo lava la le faamautu ai o le siamupini o le Aulakapi a le Lupe o le Soaga i le talita a le Iuni Lakapi a Apia i le faaiuga o le taamilosaga lakapi, ma le tausinio loa o le auvaa latou i tuuga fautasi ma maua ai le tulaga tolu.
E muliga foi le faataliga o le aulakapi i lana manumalo i le faataliga o le auvaa. A iai se tasi e lei maua faaiuga o le tuuga fautasi e mautinoa lava ua faapea o Tama o le Lupea lea ua manumalo i Tuuga Fautasi o le Sisiga Fu‘a.
“A o ai se isi o le a lē fiafia, o lea faato‘ā tauva ae o lea ua oo i le tulaga tolu,” o le finagalo lea o ta‘ita‘i o le afioaga i lauga na faataape ai le faatasiga a le auvaa ina ua mae‘a tausinioga.
O tina ma fanau ua aga‘i uma ane i le alatele e faatali le oo atu o le ‘au ma faapea ona faatautaia ai lava ma fiafia i le ogatotonu o le aai auā le sami ai o lea laasaga maoa‘e i ia alo o le afioaga.
O le aiavā a le afioaga na faia ina ua taape le auvaa ae o le $17,000 tala o le latou faailoga, e $1000 na ave i le afioaga, o le $1,500 na ave i faafeagaiga, o le $5,000 na tufa i le auvaa ae o le tele o le tupe ua teu nei auā sauniga a le ‘au mo Faagatama o le Tai i le Teuila.
Ua faaalia e le auvaa le faafetaia o le tapuaiga a le afioaga aemaise o le faamalosiau ua tuu atu e sui uma o le afioaga a o alo atu ai mo isi tausinioga i le lumanai. O Tama o le Lava le isi sa fou lea na tausinio i faagatama o le Tai ma na manumalo i le tulaga lima, ma o le faamoemoe ina ia siitia atili foi le taumafaiga a le sa o Leauvaa i isi taamilosaga i le lumanai.
