I le mae‘a ai o le silia i le 10 tausaga talu ona ia faafoeina fautasi i le tofiga Kapeteni, ua faamavae le Afioga Vaimasenuu Zita Martel mai faagatama i le Tai.
O se faaaliga lea a lenei tamaitai ina ua mae‘a tausinioga fautasi o le faamanatu ai o le 48 o tausaga o le Tutoatasi o Samoa i lenei tausaga.
Faaalia e Vaimasenuu, ua iloa ua oo i le taimi e see ese ai ma le kapeteni ae tuu atu i se isi lenei tofiga.
E pei lava ona silafia, o Vaimasenuu Zita o se tamaitai muamua ua tulai mai i le tofi kapeteni o se fautasi i Samoa, ma e see ese nei mai i le tofi, e lei iai lava se isi tamaitai ua ia ausia lea foi laasaga maoae i taaloga.
Na amata lenei tofiga i se fautuaga a sui o le aulotu a lenei tamaitai i le Katoliko i Siusega pe mafai ona ia faafoeina le fautasi o le Aulotu sa fausia mo faagatama o le tai.
O le talosaga na talia e lenei tamaitai – o se tasi ua tele foi tausaga o tausinio i tuuga vaaalo e pei ona iai kalapu i totonu o le atunuu.
Na faapea ona amata ai loa lenei galuega tele ma na i‘u ina fautuaina e le sui o le Aulotu, o le Alii Palemia foi lea le Susuga Tuilaepa Sailele Malielegaoi, le aulotu pe mafai ona alo e leoleo le sā o le aulotu ona o le manaoga i lea vaitau ina ia unai toleniga a Leoleo ia na sauni atu mo galuega faatausi filemu i vaega eseese o le Pasefika ma atunuu mamao.
O se faiga na vaaia ai loa le faaaogā e leoleo o le sā o le Segavao mo toleniga ma na faapea foi ona manumalo ai i se tasi o tausinioga o faagatama i le tai.
“O le taimi lea a e vaai i le malosi o leoleo na matuā maualuga lava,” o se faamatalaga lea a Vaimasenuu.
Faaalia e lenei tamaitai na mae‘a lea ae fausia le vaa lona lua a le Segavao lea na faaigoaina o le Digicel Segavao II, lea na manumalo nei i le tuuga fautasi o le Fu‘a o Samoa i lenei tausaga.
Ua sefulu (10) tausaga o le fautasi ae ua foi mai i Amerika Samoa ma ua iloga le sao i tausinioga i le tai i Samoa nei.
O tama a‘oga la o le Matata Eseese o le Don Bosco le auvaa ua lauiloa ai nei le Segavao II. Faaalia e lenei tamaitai, o le mae‘a ai o le 10 tausaga o le a lē mafai ona ia faagalo le suiga ua vaaia i le maualuga o tausinioga i tuuga fautasi, ma o lona manatu o se tausinioga o le a tumau le fiafia i ai o le atunuu.
Ae e iai ana fautuaga i le toe faaleleia atili o lenei tuuga, ma o le tasi o ia fautuaga na ia ta‘ua ai e tatau lava ona manino le tuu eseese ai o fautasi fau i laupapa ma e faatautaia i foe laupapa, ma vaa e fausia i tomai faaonapo nei ma ua tele suiga ua faia i tino o ia sā ina ia faafaigofie ai ona alo.
O lea fautuaga na sau i le tausinioga faavaomalo muamua lea ua faatautaia i Samoa ma e ui e foe sipuni uma fautasi na tauva i lea tuuga ae na ta‘ua e Vaimasenuu na manino lava e lē tutusa le Segavao II ma le sā o le Aeto.
“O le sā a le Aeto mai i Amerika Samoa e matuā maoa‘e lava le fausaga i tulaga tau i tomai faaonapo nei, e fai o le vaa o le fibre glass e pei lava ona fausia ai le tele foi o fautasi, ae e minoi atoa lava vae e oo i tau‘au i le faafoeina o lenei sā, e lē pei la o le vaa o le Segavao na o tau‘au lava o tama o loo faaaogā auā e lē minoi nofoa,” o sana faamatalaga faalauiloa lea.
“E matuā manaia lava le sā o le Aeto ae ana lē lava la le mānava ma le malosi o tamaiti o le Don Bosco e lē oo i le manumalo e pei ona molimauina”.
O Vaimasenuu Zita Martel, o se tamaitai e manino le fiafia i taaloga ma e lē gata i tuuga fautasi lona fiafia, e tausinio foi i le aufanafana ‘aū (archery) a Samoa.
O ia foi o le sui o le Malo o Farani i Samoa nei, ma e faaipoipo atu i se alii mai Farani, ma o loo faamautu i Samoa nei ma faatautaia ai lona ofisa malaga.
