Ua taatia nei i luma o le faamasinoga se talosaga a le Loia Sili a le Malo o Samoa e toe faaui i tua moliaga e lua o le lafo o upu palauvale ma upu taufaifai o loo molia ai le tamaitai loia Samoa i Niu Sila, le afioga ia Leuluaialii Olinda Woodroffe.
O le Aso Tofi, 3 o Iuni 2010 na fofogaina ai i le faamasinoga faaitumalo i Apia le talosaga a le Loia Sili. Peitai sa fesiligia e le alii faamasino o Tauiliili Fao Harry Schuster, pe aisea ua lē oo atu ai le o oo molia.
Sa faailoa e le tamaitai loia o Iuni Sapolu sa tauaveina le itu a Leuluaialii Olinda, ua uma ona tuuina atu e lē o loo molia se imeli i le sui lesitala o le faamasinoga le afioga Li‘o Heinerick i le masina o Mati, o loo faamatala auiliili ai le mafuaaga o lona lē auai i le valaauga o le faamasinoga i le amataga o Fepuari o le tausaga nei 2010.
O loo faamatala ai foi e Leuluaialii Olinda fetusiaiga sa faia i le va o lana loia QC ma le ofisa o faamasinoga i nisi o vaega e fesootai ma lona faamasinoga. Peitai na faailoa e le alii faamasino o Tauiliili, e leai se kopi o lea imeli o i totonu o le faila a le faamasinoga.
Sa tuu atu foi e Iuni Sapolu se talosaga ina ia faalēaogā ai le tusi saisai na poloaina e le faamasinoga e pueina ai ma taofia lē o loo molia ina ua lē oo atu i le valaauga o le mataupu i le masina o Fepuari.
Peitai na faaalia e le afioga Tauiliili Fao Harry Schuster, e lē mafai ona iloiloina lea talosaga ona e lē o oo atu lē o loo molia.
Sa faailoa e le loia a le Malo sa tulai mo le Loia Sili, le susuga Gafatasi Patu, ua toe fia faaui i tua moliaga faasaga ia Leuluaialii Olinda ona ua lē lava molimau a leoleo e lagolago ai moliaga.
Ua lē faataunuuina se iloiloga auiliili a le faamasinoga i le mataupu, ona o loo manaomia le kopi o le imeli a lē o loo molia na ave i le lesitala o le faamasinoga, e pei ona saili atu e lē o maua i le faila, ae o loo iai kopi a le tamaitai loia o loo tu mo Leuluaialii Olinda faapea ma le ofisa o le Loia Sili.
I fafo o le maota faamasino ina ua mae‘a ona valaau le mataupu, sa faaalia se faanoanoaga o le tamaitai loia o Iuni Sapolu i le lē lelei ona tapena e le ofisa o le faamasinoga o vaega uma o le faila.
O moliaga faasaga ia Leuluaialii Olinda e mafua mai i se tagi a se tasi o ofisa sinia o le Matagaluega o Faamasinoga.
O loo iai nai masalosaloga o le vala lea ua mafua ai ona lē tuuina i le faila le kopi o le imeli e pei ona fesiligia e le alii faamasino.
Ua faaalia e se molimau faatuatuaina, o loo iai le fuafuaga a le Sosaiete a Loia i Samoa e faia se latou faamasinoga poo se Tribunal e suesue ai ni faaseā tusitusia faasaga ia Leuluaialii Olinda.
O le faaseā mai le Palemia susuga Tuilaepa L Sailele Malielegaoi, ma le talosaga faaseā a le Matagaluega o Faamasinoga.
O loo fesiligia i ia faaseā le taiala o amioga taualoa i le galuega faaloia ua soli e le tamaitai loia.
