O se vaaiga matauia ma le uigaese ua oo nei i ai le tomai ma le taleni a alo ma fanau laiti o le atunuu o loo aoaoina i le taina o le piano ma le leo.
O fanau mai le 5 tausaga seia oo i le 10 tausaga o loo aotauina i lenei meaalofa tāua e pei ona faameaalofaina ai le susuga ia Poulima Salima, a o lenei ua mafai ona faasafua lona iloa ma lona tomai auā tupulaga lalovaoa o Samoa. O le tausaga 2013 na amata ai lenei tauvaga taleni ma sa lē toatele ni fanau na auai, a o se vaaiga uigaese lenei ua iai le tausaga 2014 i le toatele o fanau Samoa ma tamaiti papalagi ua mafai ona aotauina ai i lenei taleni auā le galuega a le Atua.
O le afiafi o le Aso Sa, 30 o Novema na toe faatinoina ai foi lenei tauvaga i le falesa o le Ekalesia Metotisi i Mt Albert. Na tumutumu mātua ma aiga na faatasi atu e molimau le taumafaiga a fanau e pei ona aooga ai.
E 25 tamaiti sa aotauina ma ua mafai ona taina lesona ma pese i luga o le piano. O le susuga ia Poulima Salima o loo nafa ma lenei tautua lelei mo nai fanau. O le tusi faavae o lesona o le aoga, e 6 masina e tuu ai i le tamaitiiti e aoao ai, e uma loa le 6 masina ona pule loa lea o le faiaoga ia Poulima ma mātua i pese e see atu i ai le isi sitepu o le olaga aoaoina.
E 12 ekalesia o loo iai o latou sui i totonu lenei aoga piano. E tasi le aso o le vaiaso ua faaavanoaina mo le tamaitiiti e toatasi i le tasi le itula, ma o le avanoa foi lea e tuu atoa i ai le lagolago o mātua i lo laua alo e unaia ai le tamaitiiti e faatāua le avanoa ua maua.
O le saunoaga a le susuga ia Poulima Salima, e fuafua lava le umi o le aoga a le tamaitiiti i le vave o lana pue ma lana ta i luga o le piano. O se suiga tele foi lea ua vaaia i lenei tausaga, o le vave o le faalogo a tamaiti aemaise o le ta ma usu le pese, ma ua talitonu ai foi nisi o mātua sa auai o loo faaaogā tatau lava le taimi e latou fanau.
O le manatu maualuga foi a le susuga i le faiaoga ia Poulima Salima, o le tausaga fou o le a sili atu le taotele o fanau o le a auai, ona o lea lava e faaopoopo le fuainumera o tamaiti aooga.
O tamaiti sa faamanuiaina i lenei tauvaga, o Andrew Peteru, Monika Yang, Elijah Lasi, Marie Kepaoa, Jericho Avaiki, Sarah Latu, Luella Bracey, Tony Mose, Junior Sami, Nathan Yang, Toso Fata, AJ Asiata, LeManaia Ponifasio, Junior Utumapu, Katerina Fale, Talalelei Taape, Soufunasina Opapo, Canaan Setefano, Ene Aokuso, Tala Asiata, Henry Fitu, Eseta Fale, Peter Peteru, Theo Fomai ma Aisea Mailea.
