O nisi nei o tamalii o le atunuu ua loa a latou tautua i auaunaga faasalalau i luga o leitio, nusipepa ma televise i totonu o Samoa, Niu Sila ma Ausetalia. O i latou nei le afioga ia Tui Eddie Taualapini o le a malaga mai Niu Sila e faailoa lana uluai CD o le kirisimasi i le nofoaga i le Greyhoud Club i Yagoona Niu Sau Uelese.
O le taimi muamua lenei ua malaga mai ai Taualapini e faafiafia aloaia, ma o le aso lava na faamautu ai lenei faamoemoe ma faasalalau i luga o upega tafailagi le fiafia o i latou e momoo i fatuga a lenei tamalii.
O ana pese e pei o le Mai le Vavau i le faavavau, Rosalia, Falealili ma nisi ua amata ona faasoa ma toe fanufanu mai e nisi i luga o le facebook e talitali ai le taunuu mai o lenei tama pese iloga o lea foi e faigaluega i luga o le vaalele o le Virgin Blue.
O loo malaga faatasi mai Tui E.T ma ana soatau le afioga ia Savea Peseta Al Harrington Lavea i luga o le alaleo AM 1593 le Radio Samoa i Aukilani, faatasi ai ma le afioga ia Muagututia Lose (Rose) Tominiko lea e atoa i ai le faili a le Tepatasi Band, o se siufofoga mālie foi o le a pepese faatasi ma Tui ma Savea.
E lua faaili mai Niu Sila o le Tepatasi ma le ‘4Real’ o le a faafiafia i lea po ma tufa ai CD o le kirisimasi a Taualapini.
Na amata mai i Samoa i le 2AP tautua leitio a nei tamalii faasolo atu ai i le Leitio Polenisia lea na faatuina i le 1988 a o lei malaga mai Savea mo Niu Sila.
Na faaauau pea le tautua a Taualapini i Samoa ma faasolo atu ai i le TV Samoa lea sa suia ai e ia le siufofoga o le Tofa Tofae Pat Mamaia i faasalalauga o taaloga a le Manu Samoa ma isi mau taamilosaga e masii ai au taaalo.
O le tele o tausaga e fai lua foi lana galuega i luga o le vaalele, leitio,TV ma faagasolo pea le faalauiloaina o lana taleni pese, ma o le siitia mai Niu Sila na toe feiloai ai loa ma le afioga a Savea Peseta lea ua galulue faatasi nei i i le Radio Samoa i Aukilani ma taufai toe fafagu ai a la taleni pese faatasi ma Muagututuia Lose (Rose) Tominiko.
E lē gata o le mālie o o latou siufofoga ae o le logomālie foi o a latou faamatalaga faafaleaitu ma tausuaga i luga o leitio ua silafia uma e le mamalu o le atunuu mai lava i Samoa, Niu Sila faapea Ausetalia nei lea e fesootai pea ma Tui Eddie Taualapini i le tautua a le FM89.3 Samoa Sportstar i Sini.
