Ua iai se faaiuga e aveesea nisi o pisinisi tau fale kalapu o loo i le taulaga o Apia ona ua lē saogalemu le fale o loo faagaioia ai.
O le fale kalapu o le Crabbers ma le V-bar lea o loo i Tauese i Apia, o le faaiuga o le masina nei e mae‘a ai ona latou faaaogā le fale tuai o fausaga o onapo o Siamani lea o loo iai pea i le taimi nei.
O se fale ua leva tele tausaga o fai pea ma vaaiga o pulega faakolone i Samoa, ma o se fale foi sa faagaioia ai ni pisinisi i tausaga e tele ua alu ma e manatua e le toatele pisinisi sa iai e pei o le fale o Polo sa faatau ai totoga o taavale ma isi oloa eseese.
Sa faaaogā foi e pue ai se vaega o le ata faasolo televise mai Ausetalia i le tausaga e 1985, le ata o le olaga o le tusitala sikotilani mai Peretania o Ropati Lui Sitivinisone.
O luga o lea maota po le fogafale o loo i luga sa iai le faletupe o atinae i tausaga ua mavae, ae sa iai foi le faleaiga o le Sails lea ua see atu i Mulinuu.
O le vaega lea o le fale o loo iai le fale kalapu o le V-bar i le taimi nei, lea o le a siitia ese atu i Matautu i Apia, ae o le Crabbers o Vaitele i se nofoaga e sosoo ma le fale kalapu o le Johnny’s bar o le a see i ai.
O le itu mautinoa mo lea pisinisi e faigata le faaiuga e see ese ona ua masani tagata e afea le nofoaga o iai nei, aemaise lava o lea vaega o Apia e tele i ai fale faafiafia ma nisi o faleaiga.
O le pulega o fuimu ma faalavelave faafuasei e ana le fautuaga i le Malo ua lē saogalemu lea fale mo le faaaogāina, ua mafua ai ona faia le iuga e tapena ese pisinisi o loo iai.
O le fanua o loo iai le fale ua umia nei e le Malo, ma o loo iai fuafuaga mo le faaaogāina o le fanua mo nisi o atina‘e a le Malo mo le manuia o le atunuu lautele.
E lē o iai ni atugaluga tele o i latou e ana le V-bar ona o Apia lava o le a see i ai, ma e faigofie pea mo tagata tafafao aemaise o se pisinisi e tumutumu i ai tupulaga talavou.
O Vaitele i le nofoaga o iai pisinisi, ua lua fale kalapu ua iai, ma alu atu ma le Crabbers ona tolu ai lea.
O lona uiga o le a siitia le numera o pisinisi faapea ma o le a siitia foi ma tagata e agai i ai mo tafaoga ma malologa mai feau ma galuega aemaise o uo ma malo tafafao mai fafo.
