“A maua le A‘oa‘o ua inu‘ava, e soloa i le ‘au fuefue”
O le soifua maloloina ma aafiaga i ni solitulafono o nisi ia o vaega ua faaopoopo i le iloiloga a le komiti a le ‘au Toeaina a le Ekalesia Faapotopotoga Kerisiano Samoa, pe a faia le tautinoga a alii A‘oa‘o fou ua talia i le suega ulufale a le kolisi i tausaga taitasi.
Peitai ua iai ma ni suiga i tulafono a le kolisi faafaifeau faasino i le tagofia o le ‘ava malosi lea ua lē toe iai se avanoa e faasala ai poo le lua i le tolu tausaga, ae a maua se A‘oa‘o ua na tagofia e leai se isi avanoa mo ia o le soloa i le au fuefue poo le tea motu.
O le susuga i le Toeaina Faatonu o le taitaifono foi lea o le Komiti a le ‘au Toeaina susuga Toese Peleti Toailoa na ia faailoa mai le iai o ni suiga i le faia o le tautinoga lea e vailiili ai le soifuaga atoa o le tama tane ua āu i Malua.
O le soifua maloloina ua faaopoopo ona na faaalia e Toese, e tāua tele le iai o se lipoti faafomai e iloa ai o loo lelei atoatoa le soifua o se alii A‘oa‘o aemaise lava ia silafia e le ‘au Toeaina pe iai ni gasegase faigata e pei o le ma‘i fatu o aafia ai.
“E lē afaina ma‘i pei o le suka ma le toto maualuga ae o gasegase lava e pei o le fatu e faaeteete i ai, ona e mamafa galuega a Malua ma e lē tatau ona tupu mai se faaletonu ona tuua‘ia ai lea o le ekalesia”, na saunoa ai le susuga i le taitaifono o le komiti a le ‘au Toeaina.
O solitulafono o le isi lea vaega faaopoopo fou i le tautinoga ona na saunoa mai le toeaina faatonu e iai mea ua tutupu.
“O nisi o mea na tulai mai ua matou talia se tagata e alu i Malua ae mulimuli atu ai ma nisi o mea sa matou lē iloa, o ni solitulafono”. O le avamalosi le isi vaega tāua ona e lē fou lea tulafono i le kolisi faafaifeau.
“O aso ia sa avatu e le Pule o Malu se A‘oa‘o e maua i le matou Board lea ou te taitaifono ai ma sa faasala poo le lua pe tolu tausaga ona toe ulufale lea i le kolisi, peitai o le tausaga na tea nei na suia ai, a maua se isi ua na soli le tulaga lea e leai se avanoa o le soloa i le ‘au fuefue”.
O le tausaga nei e toa sefululima na talia mo Malua i le suega ulufale, faaopoopo i ai isi tama tane e toalua na faataatia mai i le tausaga ua mavae ona o ni aafiaga i ni gasegase, peitai ua faaalia e le taitaifono o le autoeaina ua avatu lipoti mai fomai ua foia ni faaletonu sa iai.
Ua to‘a sefulufitu ai A‘oa‘o ua sauni e ulufale i Malua i le masina fou o Fepuari mo le feagai ma aoaoga i totonu o le fā tausaga. O le tausaga nei i le mae‘a o le tautinoga na faia i le amataga o le vaiaso ua mavae, ua talia uma A‘oa‘o e to‘a 17 mo le Kolisi Faafaifeau i Malua.
