E toalua ni tamaitai o loo i lalo o le vaavaaiga a le Faalapotopotoga o le Toomaga mo ē Puapuagatia na tuua le atunuu i le vaiaso mulimuli o le tausaga na tea nei auā sauniuniga mo aoaoga i Niu Sila i le tausaga fou lenei.
O ni avanoa sikolasipi se lua mai i nisi o loo faapea ona nonofo i Niu Sila ae ua faaauau faiga faapaaga ma le Toomaga mo ē Puapuagatia i Samoa nei, na maua mai ai nei avanoa sikolasipi.
Ta‘ua e le Peresetene o le Toomaga i Samoa, le afioga Siliniu Lina Chang e ono (6) foi isi avanoa sikolasipi o loo faagaioi i le taimi lenei mo Ianuari ma o tamaiti uma lava o loo aoaoina i le Aoga o le Faamoemoe (School of Hope) a le Toomaga mo ē Puapuagatia lea e i Tuanaimato ia ua maua nei avanoa.
“O le faamoemoe lava lenei o le Toomaga mo ē Puapuagatia ina ia iai se isi laasaga o le olaga o fanau nei ua aafia ona o sauaga ma e faafetaia lava tagata ua ofo mai lenei fesoasoani,” o le saunoaga lea a Siliniu Lina.
O le aoga lenei ua lua tausaga talu ona faavae ona o le umi o le taimi e nonofo ai fanau ia ua aafia i sauaga eseese i le Maota o le Faamoemoe (House of Hope) ae ua leai ai lava ma ni aoga e faaauau.
O le faatuina la o lenei aoga ua vaaia ai le mafai e nei fanau ona maua le avanoa lea ae o lea ua lua tausaga ae ua maua fesoasoani mai uo a le Toomaga mo ē Puapuagatia ua malaga asiasi mai ma maua le taimi e mafuta ai i fanauaoga nei.
O le toatele o tama ma teine o loo i lenei aoga ua mae‘a ona faagasolo mataupu na suluafai atu ai i le Toomaga mo ē Puapuagatia auā se fesoasoani. Ua mae‘a faamasinoga peitai e lē o saogalemu lava le toe foi i aiga ona o aiga lava ia na sauaina ai i latou.
O le taimi lenei e to‘a 72 i latou o loo nonofo i lalo o le vaavaaiga a le Toomaga mo ē Puapuagatia i ona fale o sulufaiga i Tuanaimato. O le toatele lava o fanau ua sauaina.
O le tuutuuga o sikolasipi nei o le a nonofo le fanau ua maua nei avanoa i aiga o le Toomaga mo ē Puapuagatia poo ana paaga i atunuu mamao ma o iina o le a tausavali ai i aoga ia ua maua avanoa e faaauau ai a latou aoaoga.
