O soo se taimi lava e talanoaina ai sauaga i totonu o aiga ua tele lava ina manatu ma tuua‘ia le itupa o alii.
O le tele lava o faamaumauga ua faasino i alii solitulafono ua faia faasaga i tina ma fanau. Ae o le faatuina o se faalapotopotoga fou i lalo o le faamalu a le Toomaga mo ē Puapuagatia i Samoa, ua manino ai e lē moni atoatoa nei talitonuga.
O le faalapotopotoga fou ua faaigoaina o le Faufautua mo Tamaitai, o se tino ua faatuina ona o le vaaia o le lelei faatautaia o se tasi polokalame faapea, ua faatino mo alii o le atunuu le Men’s Advocacy Group, o le faalapotopotoga lea o tamā ua faatuina ina ia tetee atu ai i sauaga ua faia i totonu o aiga.
O le Faufautua la mo Tamaitai o lea ua tuu atu ai i le itupa o tamaitai ua avea ma sui, le avanoa e unai ai fautuaga, o aoaoga ma faamalamalamaga o le tāua foi o le pitolaau a tamaitai e taofi ai nei sauaga.
E feololo lava le numera o tamaitai ia ua vaaia le tulai i luma o le Faamasinoga i Samoa nei ona o le faia o sauaga.
“E ta‘u mai ai i mataupu nei ua faatuputupulaia le tulai mai, e tausolomua lava foi i tamaitai le amata ma le faaauau o sauaga i totonu o aiga ma o lea na tapa mai ai loa le faamasinoga ina ia faia se faalapotopotoga e pei o le faalapotopotoga a alii lea ua faatamoe e le Toomaga mo ē Puapuagatia,” o le saunoaga lea a Siliniu Lina Chang o le Peresetene o le Toomaga.
O nisi o tamaitai ua o latou faaalia ua mafua le tulai i le faamasinoga ona o le agai i le faamasinoga i faiga na saunoa nisi ua tulai mai ona o le lē mafai lava ona taofiofi le ita.
O nisi na ta‘ua e fai o galuega ua tofia ma galulue ai i ofisa ma kamupani tumaoti i Samoa ae e lē mafai ona aveese ai le tele o tiute ua tele lava ina faasino i tamaitai i totonu o aiga.
O le tele la o nei faafitauli e tulai mai i galuega faapea ai aiga ua lē mafai ai ona faasoa ma ua tele ina i‘u i fanau ma taitoalua le ita.
O nisi tina ua tulai faalua pe faatolu foi i luma o le faamasinoga ma fautuaina ai loa le agai ane i le Toomaga mo ē Puapuagatia e maua ai se fesoasoani lea la ua faatu ai loa le Faufautua mo Tamaitai.
E ese foi le tāua o le faalapotopotoga e pei ona molimau ai tamaitai ua maua mai ai lo latou fesoasoani. O le faamatalaga ua mafai ona taofi le ita ma ua tele isi metotia ua fautuaina atu lo latou faaaogā ina ia mautinoa e lē toe tulai i luma o le faamasinoga ma lē agai ai i Tafaigata ona o le ita ma le fai o solitulafono nei.
E lē o iai se tamaitai o molia i ni sauaga matagā i le polokalame ua amata nei, ae ua tulai i le faamasinoga i le faaoolima, faaoo manu‘a ma faaleaga o meatotino.
