Tama o le Malaka Siamupini o le Pimka 2019

Tama o le Malaka Siamupini o le Pimka 2019

Mai le fa vaiaso na faagasolo ai le taamilosaga kirikiti a le PIMKA, na laualuga ai i finagalo ma manatu o tagata matamata aemaise o faletapuai taitasi sa auai a latou ‘au i totonu o lenei taamilosaga, e sola le ‘au a le Kobra ma le Ipu o le taamilosaga a le PIMKA i le 2019.

Sa fua lagona ma manatu o tagata matamata i le matautia o le faatinoina e le ‘au o le Kobra o ana taaloga i Aso Toonai taitasi, lea sa matautia le tuaa ma le autata pe a oo ina taaalo ma isi ‘au. Mai le Pool A sa iai le Kobra e uma lelei ana taaloga i le Pool e lei iai sana faia’ina, ma oo ai lava ina sao mai i luga o ‘au e fa o lana Pool ma taalo ma le ‘au a le Loto Taumafai i le quarter final o loo faaauau pea lona saua i le fueina lea o ‘au taitasi ma oo mai ai i le semi final ma le ‘au a le Povi Po’a ma manumalo ai foi, ona nofonofo ai lea iina se’i tālia se ‘au e manumalo mai i le semi final a le Tama o le Malaka ma le Ao Atua ona la sailia lea o le Siamupini.

O Tama o le Malaka, na iai ana faia’ina i ana taaloga i le Pool B, ona o le lapelapea o le ‘au i lona amataga o le le lava o tama taaalo, peitai ane sa le faavaivai ai le susuga i le kapeteni ia Elia i lona finau pea e saili se ai mo lana tapuaiga.

O le taaloga mulimuli a Tama o le Malaka i lana Pool i le Aso Toonai ua mavae na faia’ina ai i le ‘au a le Povi Po’a, ae sa maua lava le avanoa e sao atu ai i ‘au e valu pito i luga, ma taaalo ai ma le ‘au a le Amoa i Sisifo i le quarter final ma manumalo ai, ona see atu lea i luga ma taaalo ma le Ao Atua i le semi final ma o se taaloga finau lea i le va o ‘au e lua, na sailia ai le ola ma le oti. E 52 ‘ai o Tama o le Malaka na tuliina e le Ao Atua i polo e 70, ma sa faato’ato’a lelei e le susuga ia Elia lana ‘au, ina ua ia vaai atu ua tulaga faaletonu le taaloga. E lei toe popole Elia ma lana ‘au i polo ae sa latou tulituliina loa pe.

E toe 10 ‘ai o le Malaka na totoe ae toe 5 le pe, e uma ane le pe a le Ao Atua ua toe 4 ‘ai o loo totoe, ma manumalo ai loa Tama o le Malaka i lana semi final.

O matematega a tagata uma sa iai i le malae i le Aso Toonai ua mavae, ua tau le malo a le Kobra, pe a faatusatusa e tagata le eseesega o le faatinoina o le taaloga mai Pools seia oo mai lava i sailiga siamupini. Peitai e iloa le auro i le afi e iloa foi le ‘au e malo i luga o le malae.

Na tatā muamua Tama o le Malaka ma latou mauaina ai ‘ai e 74 i polo e 80, ona tuli lea e le Kobra, e lei maua ‘ai e lei uma le ‘au na tatā ae ua maua polo ma manumalo ai loa Tama o le Malaka i le sailiga siamupini o le PIMKA i lenei tausaga 2019.

Iuga o taaloga i le Aso Toonai ua mavae.

Faamae’aina o taaloga i Pool taitasi.

Ao Atua manumalo Laulaau mai Farani

Tama o le Papa manumalo PIC Papakura

Amoa i Sisifo manumalo Riversdale

Kobra manumalo Maa Pupula

Loto Taumafai manumalo Tama o le Meko

Ainiusami manumalo Mountain Boys

Afaluko manumalo Maata

Povi Po’a manumalo Tama o le Malaka

Men’s Top 8

Pool A

Ao Atua, Laulaau mai Farani, Kobra, Amoa i Sisifo

Pool B

Povi Po’a, Tama o le Malaka, Loto Taumafai, Tama o le Meko

Quarter Finals

Kobra manumalo Loto Taumafai

Tama o le Malaka manumalo Amoa i Sisifo

Povi Po’a manumalo Laulaau mai Farani

Ao Atua manumalo Tama o le Meko

Semi Finals

Kobra manumalo Povi Po’a

Tama o le Malaka manumalo Ao Atua

Final

Tama o le Malaka manumalo Kobra

ma le tulaga tolu manumalo ai le Ao Atua tulaga fa Povi Po’a.

O le susuga ia Elia sa mauaina le tama taalo o le taamilosaga ma le ‘olo silia, ae o le isi sui o le Tama o le Malaka na mauaina le faailoga o le ‘ai silia.

E lua tausaga o sii e le Ao Atua le Ipu le Siamupini o le PIMKA, ae o le tausaga nei ua sii limalua ai e Tama o le Malaka.