Au Triathlon a Tahiti i le Elisa Hotel i Mulinuu, na asiasi atu i Samoa i le masina o Tesema e tapena ai mo le Pacific Games

Au Triathlon a Tahiti i le Elisa Hotel i Mulinuu, na asiasi atu i Samoa i le masina o Tesema e tapena ai mo le Pacific Games

O atunuu tetele o le Pacific Games XVI o Fiti ma Tahiti, e ova ma le tasi le afe le aofai o tagata taalo ma ofisa a atunuu ia e lua o le a malaga atu i Samoa mo taaloga lona sefulu ma le ono a le Pasefika.

O le au taalo a Tahiti e oo i le 500 le aofaiga, o le a malaga uma atu i Samoa i malaga faapitoa e lua a le Air Tahiti nui. O le vaiaso muamua e momoli ai i e le kamupani vaalele le afa o le lima-selau lea, ona toe foi atu ai lea ma le isi to’a 250 i le faaiuga o le vaiaso muamua, ae faafoi le vaega ua mae’a a latou taaloga.

Ona toe foi ai lea o le vaalele a le Tahiti-nui i Apia i le Aso Sa 21 o Iulai mo le ‘au malaga o le vaiaso lona lua.  E faapea foi ma le faamoemoe o Fiti. E ova ma le 500 le aofaiga o tagata taalo ma ofisa ua ioe iai le Komiti Olimipeka a Fiti e tauva i Samoa. E faalua foi na malaga le Fiji Airways faapitoa mo le momoliina o a latou tagata i Samoa.

O isi atunuu o le a toatele ai le fuainumera e iai New Caledonia ma Papua Niu Kini. O atunuu foi ia, ae maise New Caledonia o le a faamanuiaina i le tele o Pine o le Taaloga.

O se tala fiafia mo Tahiti, o le toe sao lea o le atunuu i totonu o le li’o o le Pacific Games. Auā na faatea ese mai taaloga a le Pasefika, ae ua toe talia nei e le Fono Aoao o le Taaloga a le Pasefika, atumotu a Falani i Polenisia e auai i Samoa.

E faigata mo atunuu ia, auā e na’o le pau lea o le avanoa e tauva ai latou tagata i taaloga aoao o le lalolagi. E le au Tahiti i le Olimipeka e pei o Samoa.

O tagata-nuu uma i Tahiti e sao atu i le Olimipeka e auala ia Farani, peitai, e lē o tusa le maualuga o taaloga i Tahiti e pei o Farani.

O lona uiga e le auala Tahiti atu i le Olimipeka e pei o Samoa. O le mafuaaga foi lea e tausinio ai lava Tahiti ma New Caledonia mo le Pacific Games auā o le maualuga lea o taaloga e mafai ona tauva ai o latou tagata.

O le vaiaso na tea nei na malaga faapitoa atu ai i Samoa sui o Tahiti e vaaia nofoaga o le a faatino ai taaloga. Ae o le masina o Tesema ma Novema na tauva ai i Samoa ‘au Pasiketi Polo ma Triathlon a Tahiti i Apia, auā tapenaga mo Iulai.

Ua faafetaia ai e Tahiti le avanoa e toe ofi ai i totonu o le Pacific Games. Na ta’ua e Teva Bernadino, o le Ulu lea o le Misiona a Tahiti, ua matua fiafia tele Tahiti e taalo faatasi ma atunuu o le Pasefika. “Ua matuā fiafia tele le matou Komiti Faafoe o le Pacific Games i le avanoa ua toe tuuina mai mo Tahiti. O le a agai mai foi Tahiti e tauva mo le tele o Pine Auro, o le matou lea naunautaiga mo Samoa i le masina o Iulai.”

“E oo foi i alii ma tamaitai taalo ua naunau tele e fia tauva i Samoa. O le Pine Auro lava e manao ai matou, ae maise ai i taaloga e iai le Alo Vaa, Taekwondoo ma le Table Tennis.”

O le aofaiga a Tahiti e iai le 189 tama taalo, 144 tamaitai taalo ma le 200 ofisa ma faiaoga o le a malaga faatasi ma le autaalo.  Na ta’ua e Sommers, e tauva Tahiti i taaloga uma lava, pau taaloga e le tauva ai Tahiti o le Kilikiti ma le Faataavale Polo. A’o taaloga uma o le a tapena ai Tahiti mo le Pine Auro.

I le Pacific Games XV i Papua Niu Kini i le 2015, na tu tolu ai Tahiti i le faitauga o Pine, na na maua a latou pine e 114.

O Papua na muamua, ae tu lua ai New Caledonia.

E iai le faamoemoe e toe asiasi i Samoa sui o Tahiti a’o loma Iulai mo se asiasiaga lona lua o nofoaga o taaloga i Apia, ona o le naunau tele o Tahiti mo se tulaga maoa’e na te ausia i Samoa.