O le molimau ola a le tama ia Taiivao Pulumelo Sione Robertson, o le faigata o le taumafaiga o totonu o aiga i aso la, ua tapena ai manuia i le taimi nei. E faatusatusa le tala a le tamā i le suiga ua iai nei vaitaimi i le faigofie ona maua e fanau o le lelei ma le tamaoaiga ua mafai ai ona ola ma lelei tulaga o a latou aoaoga ma galuega.
Ae fai mai le tamā o aso la, sa taumafai lava ona mātua e faaaooga i latou i le faatoaga na maua ai tupe e taumafai ai aoga auā so latou lumanai. A maua se tupe e mātua, ona faasoasoa lelei lea auā aoga, o mea e fai a le lotu aemaise o le nuu, auā sa lē tetele ni tupe sa maua.
I lena vaitaimi e finau lava mātua ma aiga latou e saili mea e maua ai tupe, auā pe la ea sa tele ni galuega na tua iai mātua, e leai o le faatoaga lava sa tele iai le galulue lea na taumafai ai aiga.
O le A’oa’o ia Taiivao Pulumelo Sione Robertson na soifua mai i le aso 2 o Fepuari 1949 i le nuu o Faala Palauli, ona omai lea o ona mātua ia Sione Robertson ma Falematai Taiivao i le isi aiga o le toeaina i Salelologa ma nonofo ai ma faaaooga ai loa lana fanau, lea na amata ai loa le olaga a’oa’oina o lenei tamā i le aoga tulagalua a Salelologa ma faasolo atu ai i le aoga a le lotu i le Kolisi o Tuasivi.
Ina ua mae’a ana aoaoga ona malaga mai lea i Apia i Pata i Falelatai ma nofo ai ma atina’e le aiga o lona tina ina ua maua lana galuega i le ofisa o aoga i le tapenaina lea o pepa suega a fanau aoga, i le School Certificate (School C) ma le UE.
E lei uma lana galuega ae na toe foi i Pata i Falelatai e tausi ona mātua ina ua ta’u mai le ma’i o lona tamā, seia oo lava ina valaau le Atua i le soifua o lona tuaa, ma toe foi ane loa ma faaauau lana faigaluega e pei ona toe faigaluega ai i le ave kiliva i le fale asikulimi a Koki.
O le tausaga 1985 na malaga mai loa iinei i Niu Sila ma le tina o le aiga ia Aiono Tautau Faaea Faleupolu e saili manuia auā le fanau. E lei faigofie le tau faamautuina o le aiga i nei atunuu, auā sa tau saili ni galuega aemaise o le tau amata o le suiga fou o le atunuu ua malaga mai ai. E ui i ia faafitauli i lea vaitaimi ae sa alofagia lava e le Atua le aiga ma faasolosolo mai ai ona manuia i le fanau.
I le taimi nei ua galulue tamaiti e toafa ma ua lelei galuega, ua toe manatu ai le tamā i le faigata o le olaga i Samoa i le faafaileleina mai o le olaga tautua seia oo mai i le tau amataina o le aiga i Niu Sila ae o lea ua ‘ae’ae i manuia o le Atua ona sa asa mai i le vao filifili o faigata ma faafitauli ae o lea ua manuia ai. O le mau maumaututu a le aiga e faapea, “Aua le faavaivai i le filiga, ia malosi le loto ia auauna i le Alii.” (Roma 12:11).
O le afiafi o le Aso Toonai na atoa iai le 70 tausaga o le soifua o le tamā ma o lea sa faamanatuina ai loa lona aso soifua i le Fale o Samoa i Magele. Na auai le tele o susuga i faafeagaiga ma o latou faletua aemaise o lupe faalele o le aiga, o susuga i a’oa’o o le pulega, o lana ekalesia EFKS i Mount Eden ma le Matagaluega Aukilani.
O le susuga i le faafeagaiga ia Rev Togafiti Tuaoimaalii o le ekalesia EFKS i Mount Eden na ta’ita’ia le sauniga. O lana faamalosi i le aso soifua o le tamā e faapea, ia tumau pea le faamaoni i le galuega, ia maua foi le malosi e faaauau ai lou valaauina e pei ona e galue ai i le tofi A’oa’o Fesoasoani i totonu o le ekalesia ma ia tumau foi i le faatuatua. O le susuga ia Rev Lama Melford o le ekalesia EFKS Green Bay na saunia le tatalo e faapaia ai le keke.
O le susuga i le A’oa’o ia Taiivao Amosa Robertson o le uso o le toeaina sa fai ma fofoga o le aso, ae o le fetalaiga ia Faaeafaleupolu Tapusoa sa tu tootoo i faaaloaloga. Tele faafiafiaga eseese na fai ma molimau o le aso fiafia o le tamā aemaise ai o faafiafiaga i musika a le faili lauiloa a le Fantastic Band na faasolosolo ai faamanuiaga o le aso.
E toafa le fanau a le susuga i le A’oa’o ia Taiivao Pulumelo Sione Robertson ma lona faletua ia Aiono Tautau Faaea Faleupolu, o Sanah mai Melepone i Ausetalia, Lole o loo nonofo faatasi ma ona mātua i Niu Sila nei, Matilda Tautau o loo aumau i Brisbane ma lona toalua ma le la tama, ma Ivana o loo nofo i Brisbane Ausetalia.
O le moomooga o le tamā ia maua pea e ia nisi tausaga se tele auā tiute ma tofiga ua tofia ai o ia i totonu o le aiga, ma le ekalesia, EFKS Mount Eden i lalo o le taitaiga a le susuga i le faafeagaiga ia Rev Togafiti Tuaoimalii ma le faletua ia Masae Tuaoimalii.
