E tolu aso toonai mai le aso 7 i le aso 21 o Setema, na faagasolo mai ai taaloga a le Pulega EFKS a Saute e pei ona amataina i taaloga o le kirikiti ma le volipolo.
O taamilosaga voli na faia i le Logan Metro Sports Centre i Browns Plains ao kirikiti sa faia i Wynnum.
O se mafutaga fiafia i le tausinio uma o autalavou taitasi o le ‘auga lava o le fiafia.
O le naunau o aulotu taitasi i lea taamilosaga ua leva na faa kalenaina i fuafuaga o le tausaga ale Pulega, ua mafai ona solosolo lelei ona o le tasi o loto o tagata uma ma le mafuta mai o le Atua, lea sa sao ma uli ai mea uma mai le uluai aso seia oo i le toe aso nai Moamoa.
O le tuu alalo a le Aufaigaluega aemaise o e tino matutua ma le aumautofi na malū ai le tai ma to’a filemu mea uma.
E 8 aulotu EFKS o le Pulega a Brisbane Saute na auai, ae o le ekalesia a Centenary ma Ipswich Central sa tuufaatasi.
O le Kirikiti a tamaitai na siamupini ai le ‘au a le Ola Fou mai Southwest Brisbane.
E tasi le au na soo lana taamilosaga e le i faiaina o le au a le EFKS a Southwest Brisbane, Rev Elder Tauaaga ma le faletua ia Reeta Matafaa, ae tulaga lua le ekalesia a East Side susuga ia Rev Faasoi ma le faletua ia Taleta Maua na o le tasi le faia’ina i le taamilosaga atoa.
O le Pulega Purisipeni i Saute e lua iai Pulega o le Matagaluega a Kuiniselani i Saute. O le Taitai o le Pulega o le susuga i le Toeaina Faatonu Rev Tauaaga ma le faletua ia Reeta Mataafa o loo avea foi ma Toeaina Faatonu o le Matagaluega a Kuiniselani i Saute.
O le susuga ia Petaia Lima (Ofisa o Aoaoga Kerisiano a le Matagaluega Kuiniselani i Saute) sa fesoasoani i le Laulau Autalavou a le Pulega ao feagai ma taaloga ona o loo feagai le Peresetene ia Rev Neti Seluka ma faigamalologa.
O ‘aulotu sa tausinio i taaloga ale Pulega i lenei tausaga e aofia ai :
• Southwest Brisbane -Rev Elder Tauaaga ma le faletua ia Reeta Mataafa
• East Side- Rev Faasoi ma Taleta Maua
• Ola Fou – Rev Sabu ma le faletua ia Su’eata Samoa
• Maaola o le Talalelei – Rev Niuetasi ma Senetima Auapaau
• Au tuufaatasi a Centernary – Rev Makisua ma Nima Reupena tuufaatasi Rev Simona & Deeana Ene Ipswich Central
• Papa O le Olataga-Rev Neti & faletua ia Faau’u Seluka
• EFKS Brisbane- Rev Dr Aukilani ma le faletua ia Mau Tu’iai
Ua faamoemoe o le a faia le laugatoni ma tufatufa ai faaailoga i le vaitaimi tonu ua atofaina mo mafutaga faaleagaga a autalavou a le Pulega ia Tesema, o le a fiafia ai autalavou uma ma taualuga ai galuega o lenei tausaga.
Laulau – Autalavou ale Pulega a Saute
Peresetene Rev Neti Seluka (feagai ma faigamalologa)
Sui tulaga le susuga i le faageagaiga ia Petaia Lima
Failautusi- Susuga Motu Sitanilei (Papa o le Olataga)
Teutupe-Afioga Faumuinā Lavea (Southwest Brisbane)
