Ua vivii e le Ofisa Sili o le pulega o taaloga a le Pasefika le susuga Andrew Minogue le lelei o tapenaga a Samoa mo taaloga a le Pasefika e faia i a Iulai o le tausaga fou 2019.
O le vaiaso ua mavae sa malaga ai i Samoa le Ofisa Sili mo nisi o feiloaiga ma le pulega o le ofisa autu o taaloga a le Pasefika i Samoa e silasila poo fea ua oo iai tapenaga a le atunuu. O le tulaga i nofoaga e faia ai taaloga o se itu maualuga lea i le silasila a le Ofisa Sili, aemaise o le fesoasoani a le Malo o Saina ua fausia ai se tasi o fale taaalo fou i Tuanaimato mo ia taaloga. O le Malo foi o Saina ua fesoasoani mo le toe faaleleia o nisi o nofoaga mo taaloga e pei o le fale taalo ma le malae o taaloga i le Apia Park.
Na faaalia e Andrew o le isi tapenaga pito fiafia iai atunuu o le a auai, o le faamautu lea o au taaalo uma i faletalimalo i le taulaga e tu lalata i nofoaga o taaloga. Fai mai Andrew ina ua faailoa i atunuu lea vaega o tapenaga, e leai se atunuu e lei talia fiafia lea tulaga ona e sili ona maua le tulaga tutoatasi poo le privacy o tagata taaalo pe a nonofo i faletalimalo. E le pei o nofoaga e nonofo faatasi uma ai poo le village, e tai sefulu pe sili atu tagata taaalo ise potu tele se tasi. O le nofoaga o falea’oga i Malifa sa masani ona avea ma nofoaga e faamautu uma iai tagata taaalo i taligamalo a Samoa i isi taaloga a le Pasefika ua tuanai. Peitai o Papua Niu Kini le atunuu muamua na latou faanonofo tagata taaalo o le Pasefika i faletalimalo, ae ua lona lua nei i a Samoa.
Faaalia e le Ofisa Sili o le ofisa o taaloga a le Pasefika i Samoa le susuga Hele Matatia e 11 miliona tala le tupe ua pasia mo le faatupeina e Samoa o ia taaloga i le tausaga asau, ma e ui ina o le a faamautu au taaalo i faletalimalo ae o loo iai isi fuafuaga mo nisi nofoaga e faamautu iai ‘au taaalo pe afai e iai nisi tulaga e ono aliali mai.
E 26 taaloga o le a tausinio iai au taaalo ma o le a tausinio ai au taaalo a Niu Sila ma Ausetalia. O taaloga foi a le Pasefika sa faia i Papua Niu Kini sa uluai auai au a Niu Sila ma Ausetalia ae sa nao le fa taaloga sa mafai ona tausinio ai.
Ua fuafua e 4 afe tagata taaalo e aofia ai ma ofisa o au taitasi o le a auai i taaloga a le pasefika o le 2019. I le mataupu i le su a le ofisa o le pulega o taaloga a le Pasefika faasaga i le asosi o taaloga a le atunuu o Tonga ma le Malo o Tonga ona o le toe faamaamulu mai le taligamalo mo ia taaloga, ua faaalia e le ofisa le susuga Andrew Minogue e toe valaau i le faamasinoga i le masina fou o Novema, peitai e le fia faia tele iai sana faamatalaga i le mataupu ona ua i luma o le faamasinoga.
