O Maagiagi ma Afega faapea Solosolo o nisi ia o afio’aga ua afea ise fesoasoani taua a le Malo o Saina, o le a’oa’oina o le su’isu’i ma le gaosia o meataulima mai tagata popoto o Saina. Na faaalia e se sooupu o le polokalame fesoasoani ua naunau le Malo o Saina e aumai i Samoa lea polokalame aua a lelei ona aoaoina tina i le su’isu’i ma gaosi meataulima e mafai ona avea o se tomai e faatino ai se pisinisi laititi ma maua ai ni seleni e tua iai mea fai a le aiga aemaise o le nuu.
Atonu e le tau fesiligia lea tulaga aua o tatou i Samoa a maua sina pisinisi e maua ai se tupe ona fiafia lava lea o le tama ma le tina e le faigaluega e faagaioi si pisinisi faapea e maua sina seleni.
Na faaalia e le Amapasa o le Malo o Saina i Samoa le susuga Wang Xuefeng, o le vaega muamua o le fesoasoani na aoaoina ai tina e valusefulu i le tausaga ua mavae.
O le vaega lona lua i le tausaga nei e toa selau tina ma e tele se sootaga lelei na mapuna mai ai i le fesoasoani, ona na faaalia e le Amapasa e iai tina na auai sa latou faaalia le fiafia i le poto ua maua ae o le isi itu taua o le vavalalata o le mafutaga ma nai alii ma tamaitai Saina sa feagai ma le a’oa’oga. Fai mai le amapasa o upu a nisi tina o le a’oa’oga ia nonofo pea i Samoa faia’oga o le su’isu’i ma le gaosia o meataulima ona ua mafanafana le latou mafutaga. O le fesoasoani lenei e aumai ai e Saina laau su’isu’i ma a maea le a’oa’oga ona alu lava lea o le tina ma lana laau e faaaoga i lona aiga.
Peitai o se tasi o afio’aga sa auai o latou tina i le tausaga ua mavae ua faaaoga faatasi uma a latou laau su’isu’i e tau fai su’i faatasi lavalava o nai o latou aiga. Ua maua foi nai galuega o mea su’isu’i ma maua ai se seleni ua teu e au uma iai tina i le faaaogaina.
O le Matagaluega o Tina ma Tamaitai Atinae o Nuu ma Afioaga ma Aga Fesootai sa faatautaia se latou polokalame i nuu o le atunuu i le tausaga ua mavae i le faamoemoe e tapue atinae lelei mo le manuia o aiga o le atuuu. Faaalia e le Pule sili o le matagaluega le afioga Afamasaga Faauiga Mulitalo o le maea o lea polokalame na faaosofia ai le fia lagolago o le Malo o Saina ma faatino ai loa le polokalame o le a’oa’oina o le su’isu’i mo tina o nuu ma afioaga faapea le aoaoina o le gaosia o meataulima.
