O le lipoti a le komisi o sulufaiga lea na faatautaia i sauaga i totonu o aiga, i Samoa, lea o loo tuua’ia ai le lē lava o galuega faatino a faifeau e fesoasoani ai i le tuuitiitia o sauaga i totonu o aiga, ua faaalia e Tuilaepa Lupesoliai Sailele Malielegaoi, ua faate’i ai nai faifeau ma le faatinoga o latou galuega.
Saunoa le Palemia, o le tuufaatasiga o le lipoti, o loo faatino le galuega a le komisi, ae ua tauau ina pe ai le fatu a Ekalesia Soofaatasi, ma tuua’ia ai le tusitusiga o suesuega a le komisi agai i le galuega a faifeau.
O le matau a le taitai o le atunuu i le lipoti o le faavae o le lipoti, o loo agai i sauaga i totonu o aiga i mea lava tau tupe, ma o nisi o ia tuua’iga e mafua lea i le tele o mea faalelotu.
“Ona o Samoa, ua tatou masani lava tatou i tu ma aga faa Samoa, e faatauvaga le faiga o mea nei o alofa ma taulaga, ona o le mafaufau loloto i le faatāuaina o le soifua faa atali, ae lē o lilifa i le olaga faasoifuaga lea o loo tatou soifua ai.”
“O i tonu lava lea o loo agai mai iai faitioga mai i le Ekalesia Soofaatasi Faatasi, ma o loo tau momoli mai ai le faagaulemalie o le Ekalesia Soofaatasi ona e foliga mai e matuā leai se gaioiga a faifeau e tau taofiofi ai, aemaise faiga tetele ia e pei o taulaga ma alofa, e tiga lava ona lē lava le faasoa ae fai lava ona o le faatauvaga lea e fai.”
Saunoa Tuilaepa e tatau ona malamalama lelei le mataupu lenei e lē o aafia uma ai faifeau, ae e nate talitonuina foi, e le tusia fua le lipoti a le komisi o sulufaiga e pei ona o latou suesueina ai le mataupu. “E lē te’ite’i foi oo lipoti nei i le komisi, oi latou lava ua saga faifai tetele i luga latou taulaga ma latou alofa ona toe o lea ua toe ta’u i le komisi, ae leai lava se isi na fai iai e o e soona fai na mea.” Ae talitonu le taitai o le atunuu o le faate’i lea a le komisi, e aogā foi, se’i tau faapupula ai le vaega lea e faasaga iai le lipoti, ona galulue lea agai iai ma ave iai se latou fesoasoani.
Saunoa Tuilaepa sa tatau foi i le komisi ona tau faamāmā teisi lo latou aao i le tuufaatasiga o le lipoti, e lelei le lipoti e faatalanoa i tua, ae a faasalalau loa i le lalolagi e pau le mea maua o le maasiasi ai o nai toeaaina o loo faamaoni i le tala’iina o le tala lelei. “Aua foi le fia lelei tele i fafo, ae fai fuafua, e pei lava o le faaupuga ua tatou masani iai, e tasi le lago mate e na te faaleagaina le suauu manogi, auā e toaitiiti lava ae ta’uvalea ai nai toeaiina.”
O le tausaga nei, lea na faalauiloa mai ai le lipoti a le komisi suesue, le faatupulaia o sauaga matagā le atunuu, atoa ai ma le faapea mai e lē o lava la latou galuega fesoasoani e tuuititia ai le faafitauli ia poo le tafiese ma le atunuu.
O le sailiiliga na faatautaia faapitoa e le Komisi o Sulufaiga i lalo o le fesoasoani a Malo Aufaatasi, ina ia unaia aiātatau a tagata soifua aemaise oi latou o loo moomia le puipui ma ia faamautinoa e malo a latou matafaioi tau aiātatau a tagata soifua. Na agai le suesuega lea i le atunuu, e ala i faatalanoaga na faatino i le atunuu lautele, aemaise ai o faatalanoaga e lei fia faalauteleina mai i alii ma tamaitai na sauaina, o sui mai i matagaluega a le malo, aemaise o faifeau mai i Ekalesia taitasi i le atunuu.
O le sailiiliga la lea na manino mai le fautuaga a le Komisi na faatautaia le sailiiliga le lē lava o galuega o loo faatautaia e faifeau e fesoasoani ai i le faafitauli.
Fai mai le suesuega e ui ina atagia le maliliega i le gasologa o fefaasoaiga o le sailiiliga, i le matua tāua o le sao o le lotu, peitai na manino lagona e lē o faatinoina i se tulaga e tatau ai ona oo iai le matafaioi a le lotu. Fai mai le sailiiliga e tele lape poo ni vala o loo fesoasoani i le faaauauina o sauaga i totonu o aiga.
