O le taoto o fuafuaga a le matagaluega o tupe maua a le atunuu, i le aumaia o se fa’ata faapitoa –mobile x-ray scanner e siaki ai oloa o loo aumaia i totonu o pusa oloa poo containers, o se fuafuaga atonu e tuuitiitia ai galuega o loo faatino nei e le aufaigaluega o le agai e siaki pusa oloa taunuu mai i le uafu.
O lea fuafuaga ua fuafua e tatau ona faataunuuina i le tausaga fou. Faaalia mai i lipoti, o se tasi lea o fuafuaga ua leva ona moemiti iai le matagluega mo se masini faapea, ma ua silia nei i le tausaga talu ona matituina ma faatalia e le matagluega. E 4 miliona tala lona faatupega, o le a faatupe i lalo o le polokalame fesoasoani tau atinae a le Faletupe o Atinae a Asia, ADB, lea e tusa ma le 36 miliona tala lona faatupega o le fesoasoani mo le faaleleia o le uafu i Matautu, e aofia ai ma le fa’ata faapitoa.
Faaalia e se tasi o sui o le faletupe o Asia i Samoa, a’o faagasolo fuafuaga tau atina’e mo le uafu i Apia, ua iai le faamoemoe a aofia ai ma se fa’ata faapitoa lea, o lona uiga ua atoaatoa lelei le polokalame toe faaleleia e pei ona fuafuaina mo le uafu i Apia.”
Peitai, e lē o laaloa le silasila a le matagaluega, i lona faatinoga o lea faamoemoe fou, e silasila foi le matagaluega i le tulaga tau saogalemu o le aufaigaluega, e le gata i lea o le aafia ai o tagata lautele o loo galulue ai i lea vaega i le malosiaga po o o le vevela –radiation e momoli mai ele masini e aafia ai tagata soifua. Saunoa le minisita o tupe maua a le matagaluega talu ai nei i le aufainusipepa ma le aufaasalalau, Tialavea Hunt, sa tilotilo i le fau lea o se fale tele e tuu ai le fa’ata ona faatino ai lea o le galuega e, e pei o le faasolo atu iai o taavale ave pusa oloa e fa’ata ai peitai o loo tilotilo foi le saogalemu mo tagata ma le aufaigaluega.
“O lea la ua tilotilo i le faiga talafeagi o le faapipii lea o le masini fa’ata –mobile device, i tua o le loli, ona fa’ata lea, ma iloa atu uma ai lava po o a oloa o loo iai i totonu o containers.” O se faiga o le a vave ai ona kilia i tua ia pusa oloa a kamupani ma pisinisi, ele gata i lea o le a tuuitiitia ai galuega a le au siaki pusa oloa, lea e agai i totonu o pusa oloa ma faitau uma oloa o loo i totonu o pusa oloa.
Saunoa le Minisita e tusa lava foi pe faaaogā masini fa’ata e pei ona talia, ae moomia lava faia galuega toe asia a le aufaigaluega “Ae e tusa lava pe faatino e le fa’ata lea le galuega e moomia lava tagata e latou te faatinoina le galuega.” “O lona uiga e le gata ina fa’ata, ae e agai foi le tagata e toe siaki pe a moomia pe fesiligia foi.”
O galuega toe faalautele o le uafu i Matautu ua silasila ai le matagaluega i le tele o le manaoga mo se masini fa’ata e siaki ai pusa oloa e taunuu mai i le atunuu. Peitai ua lagala foi manatu ma finagalo o nisi, i le taunuu mai o le masini faapitoa lea. Faimai nisi atonu o le a aveese ai faiga faa alatua o loo tuua’ia ai le aufaigaluega, i le faatinoga o latou galuega. Ae o nisi foi ua fesiligia pe o le a avea le taunuu mai i le masini lea e faaono aafia ai galuega a nisi o le aufaigaluega ona o le a leai ai ni galuega a nisi e faatino.
Peitai na faali a e se tasi o le aufaigaluega sinia, e le aafia ai le itu tau galuega, auā o le latou matau, atonu o le a faasao ai taimi o le vave ona kilia o pusa oloa a kamupani ma pisinisi, ae o le a faaopoopo taimi mo tagata faigaluega, auā o loo moomia pea le siaki e tagata faigaluega. E iai le faamoemoe e tatau ona faapipii le masini lea i le tausaga fou.
