Pagā lea ua faigata i ni upu ona tafiesea le matuitui o puapuaga ma mafatiaga ua feagai ma Kalaiesetete ona o le afaina i le mafui‘e na sei mavae atu nei, ua lē mafai foi ona utufia loimata o le tagi ona o ē pele ua aveesea faafuasei, ma ua leai se tulimanu o Niu Sila ma le lalolagi e lei lagonaina lenei tala faanoanoa.
Peitai o le pa‘i mai o saunoaga faamalosiau ma faamafanafanaga mai taitai o le malo, taitai o ekalesia Kerisiano ma talitonuga o lotu eseese, aemaise o faamaisega ma saunoaga faalaeiau mai le Afioga i le Tupu Tamaitai o Peretania na fofogaina e le Perenise o Uelese, Prince William i le sauniga faapitoa o le National Memorial Service i Kalaiesetete, atoa ma le lalago faatasi o le itumalo Canterbury, na maua ai le loto tetele i le Alii ma aualiitia ai lea aso faapitoa i le toafimalie.
O lenei sauniga faapitoa sa taitaia e le alii faifeau (Dean of Christchurch), Rev Peter Beck, sa faatasia le toatele o taitai iloga o le malo, faauluuluga o ekalesia, le tamaitai Palemia o Ausetalia ma le taitai o le itu agai, aemaise le mamalu o le valaaulia faatasi ai ma le malo faaaloalogia HRH Prince William mai Peretania.
Ua alu foi i le talafaasolopito o lenei aai atoa ma Niu Sila le faitau silia atu i le 100 afe tagata na auai i le aso 18 Mati i le laufanua taalaelae o Hagley i Matu.
O se lagona na maitauina i le saofafai mai o tagata ua pei o se sami lanu mūmū ma le lanu pauli, taufai ifo ma faauouo atu i le isi, leai se pisa a o faalogologo ma le toto‘a i tributes felanulanuai o le aso. I le taimi o le tulai faaaloalo mo le lua minute, sa leai se gasē, leai se pa‘ō. O se lagona uigaese, pau le itu sa vaaia o le soloi o loimata maligi.
Na logo faa-Tutuila le aofia ina ua momoli mai le saunoaga a le Aiga Tupu Peretania na fofogaina e Prince William. Na ia faatāuaina le itu femulumuluai i le alofa mutimutivale (Humanitarian).
Ua logo foi i tino matagi lelei saunoaga a le alii Palemia, John Key, Bob Parker (pulenuu) aemaise faamalosiau mai taitai o ekalesia Kerisiano faapea Muslim, Jewish, Buddhist, Hindu, Bahai, sa felanulanuai ai le sauniga ma ua ta aofai ai talitonuga o lotu eseese o le lalolagiatoa.
O musika ma pese filifilia o le sauniga na matuā aumaia le lagona faamomoiloto, aemaise ai le usuina o le vii o Niu Sila i le taimi mulimuli.
O le tuuina aloaia atu o teufugalaau e Prince William i lalo ifo o le sulu, faailoga o le Malamalama o le Atua ina ia susulu pea mo i latou ua malolo atu i le nuu e tumau.
Sa faapea ona gasolosolo atu nai aiga faanoanoa ma molimoli atu teufugalaau. O le totoina o le laau e fai ma pine faamau o le amataga fou ma se ola fou mo le aai o Kalaiesetete, lea sa uluai suoina e le alii o Prince William. Kalaiesetete, tulai maia, ia lototetele i le Alii ma le malosi o Lona Mana. …KiaKaha Kalaiesetete.
