Sauni Lightning Lupe e toe oso i totonu o le maea

E lei tuumāmāina e le alii fusu o loo iai pea le fusi o le  siamupini o le Pan Pacific i le paga mamafa, Lightning Lupe, le tele o mau faamatalaga sa agai ane ia te ia ma lona taumafai i le taaloga.

E pei ona silafia sa lomia atu foi i nisi o masina ua tuanai i le Samoa Times, se tulaga sa tali mai ai le ofisa o le asosi fusu o loo i Mt Eden, ina ua suesueina ma fesiligia le mataupu i le va o le alii taalo ma le asosi fusu a Niu Sila.

O le nofo ai ma mālōlō le alii taalo o Lupe mai lana taaloga, ona sa oo ane ni lipoti maumaututu ia te ia, ma ta‘ua ai e lē mafai ona toe taalo, ona talu ai ua taofia e le asosi a Niu Sila.

O se lipoti e faapea ua mafua ona taofia Lupe e Niu Sila e lē toe fusu, ona o se lipoti sa faamatuu mai e Ausetalia, e uiga i se suesuega faapitoa a fomai sa faia.

O lea suesuega sa faamaonia ai ni aafiaga i lona ulu, ma sa lē taumate e ono aafia ai ma lona faiai se‘i tulou.

O le ala lea sa lē toe mafai ai ona toe faaaogāina Lupe, i le tele o nisi o fusuaga sa faataunuuina.

O le oo mai o lea tala i Niu Sila, ma sa mulimulitai ai lava lea e pei ona faamaonia mai e nisi o kalapu fusu i Aukilani, faapea le ofisa autū i Mt Eden.

O le tuanai ai o nai masina talu ona mae‘a se galuega fesoasoani sa faia e le Samoa Times mo lea alo o le atunuu, sa lē toe faatali ai, ae sa saili pea ma finau i se ofisa o loia o le malo. Na avea le ofisa lea ma sooupu, ma amata ai fesootaiga ma faatauanauina le asosi fusu a Niu Sila, i le sa‘o ma le moni o lea faaiuga.

Ae peitai na faateia le alii taalo ina ua maua ane se tali mai le alii Peresitene o le Asosi Fusu a Niu Sila, ma ta‘ua ai le leai o se silafia i lea mataupu. Sa faamaonia ane foi e leai se sā ma se taofiga o iai i le alii o Lupe, mai le taaloga.

O se tulaga ua toe lalaga ai le fiafia o le alii taalo, ma ua toe togi ai nei lana lu‘i i soo se tasi lava e fia taalo ia te ia, aemaise o le fusi o le siamupini o loo ia umia pea e oo mai i le taimi nei.

E ui i lea manaoga o le alii taalo, peitai e iai auala e tatau ona ia uia muamua, ina ia mafai ai ona toe talia ma lesitalaina o se tama taalo a Niu Sila.

O lea foi lipoti e pei ona faamatuu mai e le ofisa sooupu a le susuga ia Lupe, o loo ta‘ua ai le finagalo o le alii Peresitene e faapea, masalo o le lē femalamalamaai lava sa mafua ai ona tulai mai lea faafitauli.

Sa ia ta‘ua foi, afai ae iai se faafitauli faapea, o lona uiga na o Ausetalia lava, e lē aafia ai fua Niu Sila. Afai la e toe fia foi Lupe i le maea, ua avanoa nei ona toe lesitalaina o se tama taalo, ona toe faaaogāina lea.

E iai nisi sa latou faauigaseseina tusitusiga i luga o nusipepa, ma upega o fesootaiga, ma ua latou lafo ai ni faamatalaga lē talafeagai ua afaina ai le loto o le alii taalo. O lea tulaga sa avea lava ma avega mamafa ma lē nofonofo lelei ai Lupe, ae sa saili pea ma faatauanau le lumanai o lana taleni.

E tele foi nisi lavelave, ma le gasu o loo tau saili fofo ai pea i le taimi nei mo le mataupu lava lenei.

O le molimau a le alii taalo, sa ta‘ua ai se tasi o kalapu sa valaau ane ma faanoi le fusi o loo ia te ia, se‘i fai ai ana taaloga, ae toe momoli ane pe a mae‘a lona faamoemoe.

E lē gata i lea, sa faateia Lupe ina ua faalogo i le tala, ua aveese le fusi ma ia, ma e lē o toe siamupini foi ona sa faiaina i se fusuaga sa faataunuuina. E lei talitonu Lupe i lea faamatalaga, ona e lē mafai ona tupu se faiga faapea, a o loo ia umia pea le fusi ma le siamupini.

Sa ia ta‘ua afai ae ono tupu se faiga faapea, o lona uiga e aliali mai e iai ni faiga piopio ma le faaalatua o loo faia e nisi, e tau aveese ai si ana faailoga sa maua i lona tautiga ma lona taumafai.

O le alo o Samoa Lightning Lupe, sa taalo mo Niu Sila, ma o le umia ai o le fusi ma le siamupini i le Pan Pacific i tausaga ua mavae, o loo i lalo pea o Niu Sila, ma o loo tau ai Niu Sila.

O le taimi nei e tusa ai ma se talanoaga ma Lupe, o loo koleni pea, ma ua sauni nei e faatali se lu‘i mo ia, mai soo se tasi lava, e oo lava i le fusi o loo ia umia, o le a tatala foi mo se tasi e fia taalo i ai.

O le a taumafai foi ina ia toe lesitalaina lona igoa i totonu o le Asosi Fusu a Niu Sila e pei ona manaomia ai, ona toe faagasolo ai loa lea o le lumanai o lana taleni ma le taaloga.