E te fia maua ni tomai e mautinoa o le a aami solo mai ai oe i soo se vaega o le lalolagi e manaomia ai lau taleni? Aua la e te popole, e te maua lelei lava tomai na i le Future Skills.
O le tomai tau inisinia (engineering), o se tomai e fiafia tele i ai ma e taatele ona mananao i ai le tupulaga talavou, o lea foi ua faamautinoa e le Future Skills, ia latou faaaogā faiaoga e sili ona atamamai ma maoae i le aoaoina o nei tomai, ina ia mautinoa e te maua le tomai silisili a o e aoga ai.
O le tomai tau inisinia, e matuā telē sona manaomia i le toetoe lava o soo se mea e fai, i galuega tau falegaosimea, ma galuega o fausaga tetele. O se manatu lena o alii inisinia ua matuā maoae lo la potomasani i tomai tau inisinia, Philip Osmond ma Peter Boettcher, lea foi la o loo taulamua ai i laua i le aoaoina o lea tomai.
E lua aoaoga amata i mataupu nei tau inisinia o loo faia i le Future Skills. O le tusipasi amata, le National Certificate in Mechanical Engineering Technology – Level 1: E leai se pili e totogia mo lenei mataupu e 15 vaiaso e fai ai.
Ae o le uluai aoaoga lena e te aoaoina ai vaega amata e pei o le faamasani i auala e puipui ai le saogalemu a o faia ni galuega, le auala e faaaogā ai meafaigaluega, le auala e faaaogā ai uamea ma isi mea malo faapena i le faatinoga o lenei tomai tau inisinia.
Ona faapena ai lava lea ona faasolosolo i luma ou tomai seia oo ina ia e see atu e fai isi aoaoga atili ma faamausali ai sou tomai e mafai ai ona e faigaluega.
A uma ona sosoo lea ma le isi tusipasi, o le National Certificate in Mechanical Engineering – Fabrication, Level 2: E 22 vaiaso e fai ai lenei aoaoga, ae o le a aoao ai le auala e tipi ai mea, uelo ma fetuunai solo ai foliga o mea ma uamea. O ituaiga o tomai nei e mafai ai ona e faapipii pe toe faaleleia se masini poo nisi fausaga o loo fafau a‘e i umamea.
E tele fausaga tetele o le a e iloa fau mai ou tomai i nei aoaoga, e amata mai lava i le fausia o puipui uamea e sio ai ni mea, le fausia o tino o vaalele, e oo lava i vaa tetele. O le a e maua ai foi isi tomai tau e pei o le palama, faapipii pe vili toe fetuunai ni paipa, le faiga o pusaaisa, ma masini ea malulu.
O nei aoaoga uma e lua, e aoaoina ai tomai e iloa ai fausia nei mea, e lē gata e malamalama ai i le mafaufau, ae o le a iloa lelei foi ona faatino. Lona uiga o ni tomai e masani ona faaaogā i galuega tetele, galuega e lē na o lou lava tamai nofoaga poo lou aai e faatino ai, ae afai e matuā tele ou tomai o le a iai, e mafai ona e fealuai atu ai i isi atunuu eseese o loo manaomia ai nei tomai mo le faatinoga o latou galuega tetele.
Aua la e te nofoai, ae saili sou avanoa i le Future Skills, ina ia vave ona faagasolo au aoaoga, auā o lea e faagasolo pea taimi ma tulai mai lea taimi i lea taimi le tele o le manaomia o nisi e iai ni agavaa i tomai tau inisinia i mea eseese.
E lē tau moomia faapea ia e pasi atoatoa mai au aoaoga sa e iai. Manatua e leai se pili e totogia mo outou ia 16 i le 17 tausaga le matutua.
E lē matuā tele naua ni avanoa a le Future Skills o totoe mo lenei tomai, o le mea lea e tatau ai ona e vave nai loa. E mo talavou ma tagata matutua foi e aogā i ai lenei aoaoga.
