Ua silafia e le lalolagi le matautia o le alo iloga o Samoa ia Sonny Bill Williams i ana taleni eseese. Ae peitai ua sauni atu nei o ia mo le laasaga aupito sili ona momoo i ai le tapuaiga a Samoa o le taalo mo le Toa Samoa. O le ipu o le Lakapi Liki i le tausaga nei ua fuafua e oo atu i ai ua laei SBW e tautua ai mo le Toa Samoa.
Saunoa le uo mamae a Sonny Bill ia Reni Maitua ua logo foi le kapeteni muamua ia Nigel Vagana i lea laasaga ua sauni iai lenei alo iloga. O le susuga Reni Maitua, Nigel Vagana ma Sonny na taaalo faatasi uma i le 2004 mo le Canterbury Bulldogs ma samupini ai. Sa iai foi isi tama Samoa i le Bulldogs o le 2004 e pei o Roy Asotasi ma Matt Utai lea ua taalo foi mo le Toa Samoa.
O Sonny Bill na tau saili se auala e momotu ai lana konekarate ma le Canterbury Bulldogs i le 2008 auā ua lē talafeagai le totogi na faatapulaa ai lona tumau pea i le kalapu mo tausaga e tele.
Na uma sailiga o aiaiga o tulafono e lei maua se fofo e SBW ma lana pulega o Khoder Nasser. Ae peitai o le Tufatufaga Faailoga muamua i Sini a le Samoa Sportstar.com Awards i le aso 2 o Aukuso 2008 lea na valaaulia ai Reni, Nigel ma Sonny Bill.
O isi tama taaalo na maua a latou faailoga Role Model Awards i lea po, o Tim Cahill (Socceroo), Lawrence Tauasa (Boxing), Filipo Toala (Eastwood RFC), aemaise leitio faasalalau i Sini mo la latou faasalalauga o taumafaiga a alo o Samoa.
Na fesiligia e Sonny Bill ma Khoder Nasser le Samoa Sportstar.com i Sini nei i lea vaitau (2008) mo se fesootaiga ma Samoa ma faapea ona faailoa i ai o se tasi o alii taalo muamua i le Warriors, ia Henry Faafili ua taliu atu mo le Manu Samoa. Na fesootai atu Sonny Bill ia Henry Faafili ma amata ai feutagaiga na mafai ai ona maua se auala e alu ese ai SBW ma Canterbury e taalo mo Toulon i Farani.
Na siitia le tulaga o Toulon faapea le totogi o Williams i lea tausaga ma sainia ai e le Canterbury Crusaders (siamupini), sosoo ai ma le Chiefs i lana uluai siamupini i le Supa 15 i le 2011. Na taufao e le Parramatta Eels, Warriors ma le Roosters Sonny ae peitai ua manumalo le saini a le Roosters mo lenei tausaga i le NRL.
O le tusifolau Samoa o Sonny na mafai ai ona momotu lana konekarate faaletonu na taofiofi ai i le Bulldogs ma amata tatala ai lana mau lisi o taleni i le Liki, lakapi Iuni ma le fusuaga.
E talitonu o le mafuaaga lea o lona toe taliu mai e lagolago le Toa Samoa mo le Ipu o le Lalolagi ma toe faatasi ma ona uso taaalo na lagolagoina taimi faigata o lana taleni aemaise tatalo a lona aiga ma Samoa.
Atonu o le tausaga lenei e faaopoopo ai se Siamupini a le Toa Samoa i le lisi a
Sonny Bill Williams.
