E lē o toe iai lava se vaiaso o faamaumau e le Vaega Faaupufai o le Tautua Samoa i lana unai e foi mai i le Palemene i le amataga o lenei tausaga, ua toatele ni ona sui i le Fono Faitulafono o Samoa.
O le faaiuga o le vaiaso lea na talo ai se aoaoga mo sui o le Faafaletui lenei ina ia faatalatalanoa ai le Menifeso poo ana Fuafuaga Faataatitia pe a ofi atu i le Palemene ma tulai mai o se Malo fou o Samoa i le mae‘a ai o le Palota.
O lea menifeso na ta‘ua e se sui o le Tautua i le tatou Ofisa o loo taulai i le faaleleia o vaega o atina‘e a le Malo o iai nei e lē o mafai ona faaleleia.
Faaalia e Levaopolo Talatonu i se faatalatalanoaga, e lē mafai ona faalauiloa mai e ia le Menifeso ae o loo mafai ona faaali mai le taumafaiga ina ia saili auala e unai ai le tamaoaiga o Samoa aemaise o le vaavaai i auala e faaleleia atili ai le soifua o tagata Samoa auā le tali atu ai i le siisii pea o le tau o le soifuaga.
O le finagalo o le Taitaifono o le Tautua Samoa ina ua tapā i ni nai vaiaso ua tuanai na faapea mai ai, ua iloga le Vaega Faaupufai e Puipuia Aiā Tatau o Tagata i ana galuega tetele a o tulai mai ai i le foe o le atunuu, ae e tele galuega e fia faaleleia mo le soifua manuia lava ia o tagata.
E foliga mai o itu ia o Atina‘e o le Soifua o loo taulai i ai le Menifeso ae o le Aso Lulu o le vaiaso lenei i Samoa o le a faalauiloa lelei mai ai poo ā tonu lava la fuafuaga faataatitia a le Tautua e faatino ai manaoga ua faaleo muamua.
O le aoaoga na taloina i le faaiuga o le vaiaso na auiliili ai loa i sui o le Tautua ia galuega ua faataatitia pe a tulai mai i totonu o le Maota.
O le tasi o mau o loo faapea ona sailiili i ai le Vaega Faaupufai lenei, o loo tele auala e mafai ai e le Malo ona unai le tupe ma ua o latou faapea mai e na o lafoga lava o loo tele i ai le taulai a le HRPP mo se tupe maua e ese mai i fesoasoani mai i Malo i Fafo.
Ta‘ua i se taimi ua tea e Afualo Dr Wood Salele, le taitaifono o le Tautua, o le matua tele o aitalafu a Ofisa eseese a le Malo e lei aoina ma o le tulaga lenei e tatau ona vaavaai i ai e totogi mai i totonu o le Ofisa o Tupe.
O le tausaga na tea nei na faamagalo ai e le Malo se aitalafu tele a le tele o Ofisa o le Malo ma Kamupani i le kamupani telefoni o le SamoaTel. E silia i le 30 miliona tala lea aitalafu ma o ituaiga aitalafu nei sa ta‘ua e Afualo sa tatau ona faamalosia le totogi e Ofisa nei auā o se tupe tele lenei ua lē maua e le Malo.
E faigata nei ona toe faia lea tulaga ona o lea ua pasia le faamagaloga o lea aitalafu.
O le faaiuga foi o le vaiaso lenei na aloaia ai le faatau atu o le SamoaTel i le kamupani o telefoni ma telefoni feaveai o le Blue Sky mai i Amerika Samoa. E 11 miliona tala Amerika na faatau atu ai lenei kamupani a le Malo i le Blue Sky a Amerika Samoa. Ona pau lava foi lea o le Kamupani na aumai lana tauofoga i le faatauina o le SamoaTel lea ua silia ma le tausaga o tuu atu mo tauofoga lona faatauga.
E lei iai ni suiga na faalauiloa mai e le Blue Sky i le pulega o le SamoaTel ae o lea ua talia nei ia suiga i le faafou ai o le pulega o lea kamupani o telefoni. O aitalafu e pei ona ta‘ua na faaalia e le SamoaTel o aitalafu ia na faaputu mai lava i le taimi o avea lea ofisa ma kamupani a le Malo, le Matagaluega o Falemeli ma Telefoni i tausaga e tele ua tuanai.
Poo ā isi auala e mafai ai ona maua tupe a le malo lava ia e aunoa ma le tau faalagolago i fafo, o le a faamanino mai e le Tautua pe a faalauiloa lana Menifeso i lenei vaiaso.
