O mafatiaga sa feagai ai Brisbane i lologa, na mautinoa ai le tele o aiga Samoa sa faatama‘ia o latou maota ma laoa, faapea nai tagata o isi atunuu sa maimau soifua, o se faalavelave faagalogata sa leai se tasi na manatunatu i ai.
O le tele lava o ē sa maimoa i televise, faafofoga i leitio, faitau i nusipepa, silasila i upega tafailagi ma maimoa ai i vaaiga faamomoiloto, e talitonu ailoga e iai se tasi sa lei ta‘uina lenei upu Talofa e! Talofa e! Talofa e! ona o le faatumulia i le alofa.
O le ‘auga tonu lava lea o lenei polokalame “Faasavaliga o le TALOFA E”.
O nisi e misi alofa ma savali e fai se galuega fesoasoani, o nisi e Talofa e, a ma tamoe e foai pe momoli atu se seleni e faatau ai se mea o manaomia, o nisi foi, e vili le telefoni e faamaise ma faalototele i mafatiaga, ae masalo foi, sa iai foi se tasi na o le Talofa e lava ma saofai e augapiu ma se faasavaliina pe faatinoina o lea upu o le Talofa e, e lē aofia ai nai o tatou mātua matutua ma ē maua i gasegase ma tuatuagia.
O le itu la sa mautinoa ma molimauina i le Faasavaliga o le Talofa e i le tele o nofoaga na aafia, o le mataina o uiga eseese sa vaaia. O nisi itu e mālie, o nisi foi itu e faatupu manatu, ae o nisi foi vaega e momomo ai a le loto ma tuufesili pe aisea lava?
E lē aofia uma, ae tupu lava i soo se atunuu ia vaega, e moni ai le upu, E ‘o‘o le vao, o le faia foi o se tulaga ma lou mafaufau e lilo ae o loo iai le aumaitau.
O le itu sa lagona ai le faanoanoa ona o nisi sa lei mafatia ma afaina ae ua muamua tutū i le kiu e claim ai le ta‘i $1000 o meaalofa, na molimauina e le faasavalivaliga o le Talofa e nisi mai le malo pipo, ae aua foi ne‘i galo ua lau i le malo pipo ofisa o le malo poo ua toatele foi alo Samoa o galulue i galuega o sapalai maia nei fesoasoani mo ē mafatia. E leai a se mea e lilo e lē faaalia. E nanā lava le tamaimoa ae ‘io‘io mai.
O le fesiligia poo afaina ae tali sa‘o le tamaititi, “E lē o iai se vaega o le fale o afaina” lavea fua foaga e lei fai misa ae o loo ta‘u le mea moni.
O le isi vaega lē talafeagai, ona ole pagatia o nai tagata loto fesoasoani ma nisi lava o si o tatou atunuu, ae sasalu a le faaturisi a nisi o le malo pipo, ma o se vaaiga na ootia ai le loto e muamua foi tulai i le kiu o meaai ae luluu foi ma tuu i taavale pei lava o se tagata sa sisina malosi se afu.
E faamata e faamālie ma fosi i le maso, ae o ni uiga maualalo ia e lagona ai le maasiasi ma le faanoanoa i le va ma isi uso a tagata poo nisi atunuu.
Talitonu sa tele lava le au galulue a si o tatou atunuu sa molimauina le tulaga lenei sa faia e nisi ‘aufaalēalolofa.
E lagona lava le agaga faafetai ma le faamālo mai le polokalame a le Faasavaliga o le Talofa e, ia i latou uma lava sa soosoo tau‘au ma faaalufua lo latou taimi i nei galuega alofa, e tauia ele Atua le agalelei.
Ona fagufagu lemu atu lea ma fesoasoani atu ia i latou o faia lenei amio ma a latou vaisu, se‘i tautuana o loo tatou nutimea faatasi ma isi atunuu auā se manuia lautele o o tatou tagata, atonu e utagia mai se‘i taatia ia nei vaega, e avea le toatasi pe toalua e tauvalea uma ai le suafa mamalu o si o tatou atunuu. E ā le una e tau sii ae tigaina ai le atigi.
E lē a‘oa‘ia e le matapia le manaia ae talosia ia o faitau ane ai i nei tusitusiga ma sei faaaogā auā ua o se lulu lava e lele, ae valovaloia e ‘iao, o loo tele isi Samoa o loo vaai alofa ia i latou nei ma uiga o loo faaalia.
Afai e te toatamai i nei tusitusiga o lona uiga o lau susuga lena o loo aafia ai i lea vaega. Faamalie Samoa i lau faitau ona o le logo a Masefau e tata pea i ni auala e ao ina foia ai nei faafitauli.
