Ua mae‘a ona pasia e le Palemene le tulafono e faamalosia ai le ave o fanau i le aoga. Ua aiaia i lea tulafono faasalaga mo mātua ma i latou e vaaia fanau e faamaonia ua lē faia lea tiute tāua.
E toatele fanau laiti ua toe vaaia le feoai solo i le taulaga ma afisiga o oloa e pei o pusa afitusi, penitala, mea faamanogi taavale, o pine faapatu ma pine sulu, ma le tele o isi oloa laiti e mafai ona feoai ma ave.
E iai se teineititi na loka e leoleo i le tausaga na tea nei ina ua maua e leoleo o faia lea galuega, ma ua molimau mai leoleo ua toe vaaia le teineititi lava lea i le taulaga ma ua oo foi alii ofisa i mātua o le teineitiiti ma faailoa i ai le tulafono.
“Ua ave i ai le lapataiga mulimuli ina ia lē toe vaaia le teineititi o faatau ni oloa i le taulaga”, o le faamatalaga lea mai se alii leoleo satini ua lē manao e faailoa lona suafa.
Ua lē toe vaaia fanau laiti i le o e faatau ni ula manogi ona ua iai le polokalame a le faalapotopotoga o le Toomaga mo Tagata Puapuagatia ua galulue faatasi ai ma le Matagaluega o Faamasinoga ua mataitu ai ia fanau.
Ae o fanau o loo galulue i taimi o le ao (day time) ua avea nei ma faafitauli.
E tali tutusa uma tamaiti pe a fesiligia i le mafuaaga ua faatau ai ia oloa ae lē nonofo i aiga, o le sailiga o se tupe ona ua tuli atu o ia e lona tamā poo lona tina.
Ua avea la le toe vaaia o nei fanau e toatele ma atugaluga o le matagaluega o Aoga a le Malo ona ua lata i le taimi e au ai aoga.
“O lea ua iai le matou komiti ua galulue nei i le vaaia o fanau ia, ina ia mautinoa e lē toe vaaia se isi o latou i le taulaga ae ia o i le aoga.
O le aso 31 o Ianuari 2011 e toe a‘e uma ai aoga a le Malo, ae o le vaiaso nei ua toe amatalia ai aoga a nisi o ekalesia ma aoga tumaoti.
O loo aiaia sala tupe e oo i le $100 ma le falepuipui o se tamā poo se tina poo se tagata o loo iai le vaaiga o se tamaititii poo ni tamaiti pe a lē avea i le aoga fanau.
O le a galulue le komiti a le matagaluega o Aoga a le Malo i Upolu ma Savaii lea o le a latou siakiina le taulaga i Apia faapea le taulaga i Salelologa.
O le a iai foi sui o le komiti i nuu i tua, ae o loo faalagolago tele le vaaia o fanau e lē o i le aoga i Pulenuu ma Sui o le Malo.
