O se siaki tupe e $60,000 tala Niu Sila na foai atu e le Alii Palemia o Samoa, le Afioga Tuilaepa Sailele Malilegaoi, mo mafatiaga i le nofoaga eli koale i Pyke River e pei ona tulai mai ai le faalavelave i le faaiuga o le tausaga talu ai, 2010. O lenei foai na faaauala atu i le alii Hai-Komesina o Niu Sila i Samoa, HE Nick Hurley.
O le isi siaki tupe e $100,000 tala Ausetalia, na foai atu mo mafatiaga o le lologa na taia ai talu ai nei le aai tele i Kuiniselani.
Ma o lenei foi meaalofa na faaauala atu i le alii Hai-Komesina o Ausetalia i Samoa, le susuga HE Matt Anderson.
O le sauniga na faatino ai le tauaaoina atu o nei foai tau seleni, na faia i le ofisa o le Alii Palemia i le aoauli o le Aso Faraile talu ai. Na saunoa le Alii Palemia, “Atonu o lenei foai ua na o sina mea itiiti pe a fua atu i le tau e faatupe ai nei mea uma ua faatamaia ona o nei mala faalenatura, ae ou te mautinoa o le mea e sili ona taulia, o le agaaga na faia ai lenei foai.
E atili ai foi ona faatāuaina a tatou faiā vavalalata i o tatou atunuu uma e tolu, o Ausetalia, Niu Sila ma Samoa.
Ina ua puapuagatia foi Samoa i le sunami ia Setema o le 2009, sa matuā iloga le alofa tulai na faaalia mai e Ausetalia ma Niu Sila, e ese mai le tele ma le anoanoai o isi fesoasoani o loo auina mai pea a o faagasolo taimi.
Na momoli lauga faafetai a alii Hai-Komesina o malo e lua i le Afioga i le Palemia, le faiga malo aemaise tagatanuu uma o Samoa, ona o la latou lagolago atu.
