O upu masani lava e ave i se tinā lelei e silisili lava lona tau i maatāua ma penina tautele. O tua atu foi o se tamā lelei, o saofai mai ai se avā amio lelei.
O le Aso Toonai, aso 22 Ianuari i le 4 i le afiafi, na matuai faateia ai le faletua ia Lagi Ruth Pritchard i le tulaga na saunia e le nofoaalo ma le tamā o le aiga, i le tapenaina o lona 50 tausaga. O Lagi o le faletua lea o le teutupe a le mafutaga a Samoa mo a Taeao, le tofā ia Lealofi Lealaitagomoa Lausei Prichard, na malaga o ia i Samoa ma le lilo i lona manatu se mea a tupu.
O le faateia o ia, na faapea o se mafutaga a le alalafaga e pei ona ta‘ua e le tamā, peitai na matuai maligi ona loimata i le ulu atu i totonu ae usu mai le pese “Manuia lou aso fanau” ae ua faatumulia le hall i le auvalaaulia.
O le sauniga sa taitaia lea e le faafeagaiga AOG Oxley, susuga ia Pastor Kirisimasi Hytongue. O le tatalo faamanuia sa saunia e le susuga ia Ps Peteru Faraimo (AOG Morayfield)
O lea lava sauniga tāua sa auai le susuga ia Ps Tafeamaalii ma le faletua ia Lesina Iutai faapea Ps Fereti ma le faletua ia Viola Purcell.
Na soifua mai le faletua ia Lagi i le aso 11 Ianuari i le 1961 i lona alalafaga o Tiavea i Aleipata.
O Malagamaalii Ropeti Pritchard sa fai ma fofoga o le aso, o le uso lea o le tamā ia Lealofi Lausei (Vaigaga, Falelatai ma Taga i Savaii). Sa fai ma sui o le aiga o Lagi le susuga ia Tuiloma Puletiuatoa auā le feagai ai ma faaaloaloga e pei ona tasi i ai aiga na lua. Auā Tumua ma Pule sa maualuga ai ma mamalu le aso.
Sa taufai pati le auvalaaulia i se pese a le susuga ia Pesa Ilimaleota sa fai ma pese faitaga a le tofa ia Lealofi Lausei na ia faatinoina ni taga ma ia saafi ai lona alofa i si ana tautoga o Lagi Ruth Pritchard.
O le Uso Forever le faaili mālie sa faafiafiaina lea afiafi faatasi ai ma faafiafiaga ma aitema a le fanau ma le autalavou.
O alo lava ma fanau o Lagi ma Lealofi sa faia tapenaga uma, le afioga ia Taefu James Sofeni, o le ulumatua lea, o ia foi sa faia se molimau o si o latou tina e tusa ma ana galuega lelei i totonu o lo latou aiga. O alo tamaitai e aofia ai Bessie, Caroline ma Olepa sa fesoasoani malosi i le tapenaina o le 50 tausaga o si o latou tina i le taumafataga ma isi lava vaega faapea le lagolagosua a le aiga atoa.
Manuia tele lou aso soifua mai i lau manamea o Lealofi Lealaitagomoa, le nofoaalo ma le aiga atoa faapea le Ekalesia AOG.
