Ua sauni atu nei le alii siamupini a Ausetalia i le paga mamafa, le susuga ia Alex Elise Faatau’i Leapai ua lauiloa i le “LION HEART” e faafetaui le alii o Evgeny Orzov mai Rusia.
O lea taaloga o le a faataunuuina i le afiafi o le Aso Faraile aso 21 o Oketopa 2011, ma e faia i le Broncos League Club i Brisbane lava. Pei ona silafia na iu manuia le taumafai o Alex i le masina o Aperila e pei ona fusu ai ma le alii o Okhello Peter o le siamupini a Aferika i le Heavyweight (WBO) lea na faatoilalo ai e Alex lea alii i taamilosaga lona tolu i le la fusuaga sa faia i Jakarta i Indonesia.
O le agaga fiafia o lea alo saili malo poo se tamafanau a Brisbane, ona o le malosi o le lagolago mai a nai tina ma tamā matutua, susuga i faafeagaiga faapea aiga ma uo ma le mamalu o le atunuu i soo se tafa o le lalolagi.
Na saunoa lava Alex, e manuia faiva e tapuaia, o le ala lea e tau ai lau o lona faamoemoe ona o le tapuaiga mamalu a Samoa. Faafetai! Faafetai! Faafetai lava!
E ui ina valavala ma nai ona tuaa ia Leitu ma Faatau‘i Leapai ma aiga i Laulii i Samoa ona o le atina‘eina o aiga peitai e malaga mai lava ma auai i taimi o ana fusuaga.
Samoa e, i soo se atunuu o lenei kelope, faamolemole ua talosagaina e le susuga ia Alex lau tatalo ma lau tapuaiga mo lana taaloga o loma nei. Ia tafetoto ou ala Alex Leapai! Manuia lou alofaiva i le Aso Faraile, 21 o Oketopa.
