O le Minisita o Fesootaiga ma faamatalaga tekonolosi afioga Afamasaga Rico Tupai, ao ia ooti le pipine o le pou o fesootaiga satelite i le itu o Tane o le a faaaogaina e le fanau aoga o le nuu

Ua amata nei ona faaaogā e fanau aoga i le itu o tane i Savaii se fesootaiga sili ona lelei ma saoasaoa tau initaneti. Faafetai ai i le Malo e ala i le Ofisa o le Pule Faatonu ma le Matagaluega o Fesootaiga ma Faamatalaga Tekonolosi i le faatuina i totonu o le Kolisi o le Itu o Tane o se satelite ua mafai ai ona oo atu lea tautua. 

O le lelei o fesootaiga initaneti ua avanoa ai fanau i lea faaitu o Puleono i Salafai ona faaaogā fesootaiga televavave mo suesuega o mataupu o le aoga aemaise o le a laina tutusa ai ma fanau o loo aooga i Upolu i le lelei o fesootaiga initaneti e faaaogāina. 

O le afioga i le Minisita o Fesootaiga, Afamasaga Rico Tupa’i o le sui lea o le Malo sa afio e tatala le satelite fou mo lea fuafuaga lelei a le Malo

“O se miti a le Faigamalo ma ona Ta’ita’i, ina ia maua uma e aoga o Samoa, tulaga tutusa mo le unaia o le aoaoina lelei ma maua ni fanau e fiafia e faatino mataupu e pei o le Faa-Saianisi ma le Numera.  Ma o le isi lenei o pine faamau ‘O le mea lelei mo Upolu e lelei mo Savaii’.” 

O upu amata lea o le saunoaga a le Minisita ma le faamoemoe maualuga o le Malo o le oo atu o ia fesootaiga televavave o le a fesoasoani foi i le auaunaga tau fesootaiga mo le motu o Savaii.

O foliga fiafia o faiaoga ma fanau a le Kolisi o Itu o Tane

Na saunoa Afamasaga: “O le Kolisi lenei o Itu o Tane, e lima i ai aoga ua faapipii i ai nei Satelite i lalo o le Poloketi ua faaigoaina o le Connectivity Project e faaaogāina ai satellite mo le VSAT (Very Small Aperture Terminal).  Ma sa sainia lenei maliega i le aso 2 Setema 2014, ao feagai ai Samoa ma ana taligamalo mo le Fono mo Atunuu Laiti poo ua faaperetaniaina o le SIDS (Small Island Development States). 

O nei Satelite ua fesootai ai nei aoga e lima ma le lalolagi, aemaise ai le taumafai e faaaogāina fesootaiga, ina ia maua ai metotia mo le faalauteleina o le tomai ma taleni i soo se mataupu.

O lenei poloketi e 4 ni faalapotopotoga tetele o loo taulamua ai. O le Malo Aufaatasi, e tauala mai i le Iuni mo Fesootaiga o le Lalolagi, poo le International Telecommunications Union (ITU), O le Kamupani o le Kacific, sa auina mai ai nei satelite mo fesootaiga ma le Malo o Samoa, e tauala mai i le Matagaluega o Fesootaiga ma le Ofisa o le Pule Faatonu. 

O i latou nei sa galulue talu mai le sainiga aao i le 2014, ina ia taunuu lenei faamoemoe. O lenei poloketi o loo faaaogāina ai alaleo ua taua o le Ku Band. E 625 Kilo bit i le sekone le masau o lenei fesootaiga, ma e leai se faatapulaa o le faaaogāina.  Ma, e faatusa lea i le masau o le paipa ae tatala, ma e ola pea le suavai e le mate mo le 12 masina.  

O le masina o Setema 2019, o le a sui ai mai le Ku Band i le Ka Band, ma, o lenei suiga, ina ia faatupulaia le lelei o lea auaunaga. O le a faatino le iloiloga mulimuli pe a oo ia Me 2020, ona iloa lea o le isi laasaga fou. Ma e maua lea laasaga fou, pe a maua le aogā, na maua mai i le vaitaimi ao faaaogāina, aemaise pe na iai ni faafitauli na feagai ai ma lona faatinoga”.

O le isi aogā o ia masini, o le a avea lea ma auala e faaaogā mo vaitaimi o faalavelave faafuasei/ faalenatura mo fesootaiga. Ua le la ma le laina lo tatou iai pea i vaitaimi o le loulouā o le tau, aemaise ai le leaga ai o auala o fesootaiga i afā, ma le tetele o lologa i vaitaimi o timuga.  E mafai ona faaaogā nei masini pe a faapea ua leai se leitio ua toe maua, pe ua leaga foi telefoni mo fesootaiga. 

O le a maua ai tala lata mai o le tau, o faamatalaga mo le saogalemu, aemaise ai le tauanauina o i latou o loo maua mai ai se fesoasoani ina ia vave ona foia faafitauli e tulai mai.

O le Aoga Maualuga a le Itu o Tane o le tasi lea o aoga e lua i ai Aoga i le Motu tele i Salafai, ua filifilia mo lea poloketi.