Ua lua vaiaso talu ai sa faia ai le fono a le faafaletui o sui faipule o le HRPP. O se fonotaga na faamatala se sui o le faafaletui sa talanoaina ai mataupu faalotoifale a le vaega faaupufai i le faagaioia o ana galuega fai masani aemaise sa soalaupule ai nisi o faiga faavae.
O se molimau faatuatuaina na ia faailoa o se faatasiga na fesiligia ai e le ta’ita’i faipule ua molimauina pea ua tau lē oo atu i ni fono, e lei faailoaina e le molimau suafa o ia faipule ae o lana faamatalaga o sui ia ua tele mafutaga a le vaega faaupufai e lē auai.
O le taimi nei o loo umia e le HRPP le 47 nofoa o le Palemene e fua i le 50 o nofoa ma o loo umia le lua vae tolu o le aofaiga atoa o nofoa e mafai ai ona pasia soo se fuafuaga ‘anoa e tuuina atu i le Palemene.
Na faamatala se tasi o sui matua o le pati e lē o toe fia manatua le vaitau o le 1983 faasolo ane i le 1985 na masofa ai le maopoopoga o le vaega faaupufai ina ua teteva ese nisi faipule o le faafaletui ma agai lagolago le afioga Vaai Kolone ma soofaatasi ai ma le Tamaaiga a’o avea Tui Atua Tupua Tamasese Efi ma ta’ita’i o le vaega faaupufai o le SNDP lea na suia ai le faigamalo a le HRPP i le ta’ita’iga a Tofilau Eti Alesana ae see atu le faigamalo soofaatasi a Vaai ma Tupua.
“Na tutupu ia vala ona ua seetia matou i le numera tele o nofoa sa matou manumalo ai ma sa matou umia foi le lua vae tolu e faigofie ai ona talanoaina ma pasia fuafuaga a le Malo e tuuina atu i le Palemene”, o le faamatalaga lea a le sui matua o le HRPP sa avea ma faipule ae ua lē finagalo e faailoa lona suafa.
“O le mafuaaga lena e tāua ai tele le fono pea o le faafaletui e maua ai le maopoopoga ma ia aua ne’i toe tulai mai futia sa tutupu i tausaga ua tuanai”.
O le fono a le Palemene i le vaiaso ua mavae na osofai ai e le Palemia le saunoaga faalauaitele a se tasi o sui faipule o le HRPP le afioga Faumuina Wayne Fong ina ua oo le finagalo o le faipule o le itumalo tu taulaga o Faleata i le mataupu i fanua faaleaganuu ma le uafu o loo fuafua e fausia i le tolotolo o Vaiusu. Na faauilavea le Palemia susuga Tuilaepa L Sailele Malielegaoi ma ia faaalia o le tasi lea o sui na mafua ona tauva i le igoa o le HRPP ona e faigofie ona sao atu ai i le tofi faipule.
O le saunoaga a le faipule o Gagaifomauga Numera 3 le susuga Laauli Leuatea Polataivao Schmidt ua lē o toe avea ma sui faipule o le HRPP na vevela ai felafolafoaiga ma le alii Palemia ina ua tomua le saunoaga faalauaitele a Laauli i lona pa’i i le mataupu ua aveese ai o ia ma le pati.
O le faauilavea a le Palemia sa ia faalavelave ai i le avatu e le faipule o le mataupu e gata i le lotoifale o le vaega faaupufai, ae e lei solomuli ai Laauli.
Na oo ai lava ina laga mai e le Palemia le feteenaiga a Laauli ma le Minisita lagolago le afioga Peseta Vaifou i le la mataupu i le kamupani nonu.
E lei faatafa foi le osofai a Laauli ma ia faailoa i le Palemene o le taumafaiga a le Palemia e teuteu le la vevesi ae manao ai Tuilaepa e ave uma le kamupani ma Peseta ae valiano ia ma isi sui o le kamupani. O nisi ia o mataupu ua faailo mai ai e lē o nofo lelei le ta’ita’iga o le HRPP i le taimi nei ae o tulimatai ai le tausaga fou 2020 o le a mautinoa le vevela ai o tapenaga o le palota tele o le 2021.
