Hong Kong 7’s e ta’ua lea o le vae autū lea o le Taitoafitu. Ma e faatolu ona tofo Samoa i le suamalie o le manumalo aoao i Hong Kong, o le tausaga 1993, 2007 ma 2010. Ae e lua isi taaloga na taalo ai Samoa i le taaloga faaiu i Hong Kong e lei manumalo ai. O le tausaga 2010 na manumalo aoao ai Samoa i le taamilosaga taitoafitu a le IRB.  O maualuga lena na tau saili e Samoa i Hong Kong i ana taaloga e ono. Na amata i le Pool A na pulu faatasi ai Samoa ma South Africa, Scotland ma Japan. 

Samoa 17 Scotland 7 (Pool) 

O Melani Matavao, Johnny Vaili ma Tomasi Solia na mauaina le laina a Sikotilani e sikoa ai ‘ai o le taaloga i le taaloga amata i Hong Kong. Ae e ao ona tusi lima ia Sikotilani ma ana mea sese e tele na faasao ai Samoa. E tele polo na pa’u a Sikotilani ma sala e lua na faasala ai le ‘au. E lei galue tele Samoa e sue le malo lea aua na faameaalofa e Sikotilani le tele o avanoa na talia ma le faafetai e le ‘au. O lea la ua manumalo ia Sikotilani, o le a saili le malo ia Iapani i le taaloga lona lua aua e sefe atu ai e sue avanoa atu ai i le Ipu nai lo le faalagolago e toilalo Aferika i Saute i le taaloga faaiu o le Pool.

Samoa 31 Japan 21 (Pool) 

O le taui ma sui lea na talotalo iai Samoa ia taui le faiaina ia Iapani i le taamilosaga i Sini (17-21). E lima sikoa a Samoa na maua i lima o Tofatuimoana Solia (2 tatao), Alamanda Motuga, Melani Matavao ma Laaloi Leilua. Ae e lē o se taaloga na faapea na sefe. E leai aua na pipii lava ai o Iapani i le Manu seia oo ina maua sikoa a Leilua ma ma’oti ai  le manumalo o Samoa ma mautinoa ai lona avanoa i le taaloga a le o le ipu. 

Samoa 7 South Africa 21 (Pool) 

E lē o se taaloga taua tele lea ia Samoa aua ua mautinoa le sao atu i le Ipu. Na faigofie ai ona sola Aferika i Saute ma le taaloga. E tasi le ‘ai a le Manu na maua i le sikoa a Tomasi Alosio na a’aina e Murphy Paulo mo ‘ai e 7 i le taaloga. Na tau sefe le malosi o le ‘au mo taaloga taua o le Ipu i le aso e sosoo ai. 

Samoa 14 England 12 (Cup Quarter Final) 

A sue se taaloga aupito sili ona taua mo le Manu Samoa 7s i le 2019 e maua i le taaloga lea ma Egelani. E maoa’e le to’a o le ‘au i le taaloga lea. Aemaise ai le matautia o Egelani na iai, aua na malo Egelani ia USA i le taaloga o le Pool lea na numera tasi ai Egelani i le Pool D ma sauni ai e feagai ma Samoa.

E tele fana maai a Egelani ae maise ai le alii saoasaoa o Dan Norton le tagata o loo iai le matati’a o le tele o ‘ai o le World Sevens talu mai le amataga (372). Ae o Norton foi na sikoa a’o loma le malologa mai le mea sese a Samoa. Na sili ai ‘ai o Egelani i le afa 12-7. Peitai, e lei faaletonu ai le vaai taulai o le ‘au i le toe foi mai.

Na toe maua ai le sikoa e tasi a Tila Mealoi na maua i lalo o le pou, ova le a’a ma sili ai ‘ai o le Manu 14-12. E sikoa Tila ae toe tolu minute o le taaloga na totoe, e tele le taimi e toe tuli ai e Egelani le sikoa, ae e lei faafiti le Manu Samoa i lana tiute o le finau ma le puipui lelei. O le aasa o le taaloga na maua ai mea sese a Egelani ma toso atu ai le taimi ia uma ma mae’a. E ta le logo o u’u e Samoa le polo ma a’a ai i tua.  

Samoa 12 France 19 (Cup Semi-Final) 

E iai le mea sese tele lava na fai i le taaloga tāua lea a Samoa ma Farani a’o 12-14 ‘ai o le taaloga. O le sikoa a Farani i le tulimanu o le malae, na tulei ai i fafo le alii Farani i le pu’e a Matavao, na ave i le TMO le faaiuga ae peitai, na fai le faaiuga e lei pa’ū le alii Farani, ona e lei iai se ata na maua o le tulimanu lea na sikoa ai le alii Farani.

Ae na manino mai le isi itu o le malae le alu i fafo o le vae ma le tino o le alii Farani ae na faaaogā le sikoa ona e lei iai se mea pu’eata na faasino i le tulimanu lea, e maua ai se ata o le mea na tupu. E maoa’e ia faamatalaga. Ae maise ai ona o nei ona po ma le tele o mea faigaluega e pu’eina ai ata o pito uma o le malae ae e lei maua se mea pu’e ata na pu’eina le alu i fafo o le tama Farani.

E ui i lea ae na lusi le manumalo lea a le Manu Samoa 7’s ona sa tele isi mea sese a le au i le taimi o le taaloga, aemaise taimi na kiki ai le polo amata o le taaloga na le maua e Samoa a latou polo. Faatasi ai ma a’a e lua na toe faafoi i le afa o le malae. O le atoa ai lea o le fa o a’a a le Manu Samoa 7’s o le taamilosaga i Hong Kong ua toe faafoi i le afa o le malae. O na mea sese e faigofie ona tuu, sa le tatau ona tupu soo. 

O le avanoa lenei ua mamulu e ofi atu ai le Samoa 7’s e su’e siamupini ma Fiti. O Johnny Vaili na mauaina uma sikoa a Samoa i le taaloga ma Farani.

Samoa 10 USA 22 (3rd Place Playoff) 

Saoasaoa tele Amerika. Ae finau tele foi ma le Manu Samoa 7’s. O le taumafai o le Manu e tului autafa o le polo pu’e na fosi ai le tele o mea sese. O le isi solitulafono na sala-pepa ai Johnny Vaili mo le lua minute. E vava mamao ‘au e lua i le faaiuga, e fa tatao manino a Amerika a’o le lua na maua e Samoa auala ia Vaili ma Melani Matavao . Na faataalo Paul Scanlan i le taaloga lenei, o lana taaloga muamua lenei mo le Manu Samoa 7’s ae o Murphy Paulo na faamalolo. 

O le tulaga #4 tatou. O le mea sili ua ausia e Samoa le tulaga lona #6 o le tuufaatasiga o ‘ai. O Ausetalia na nofo ma le tulaga ono peitai e lei au i le Ipu ma maua ai e Samoa ‘ai e 15 e faaopoopo i le 59 na malaga atu ma le ‘au i Hong Kong. Ua iai le atoaga e 74 ‘ai tuufaatasi a Samoa i le 69 a Ausetalia. 

E tele mea aogā na maua mai i Hong Kong, a’o le mea sili o le toe faaopoopo lea o le sao o le ‘au i le tumutumu o le HSBC 7’s. Ae e iai foi ma lesona e tele na maua mai ai. E ono taaloga a le Manu, manumalo i taaloga e tolu ae faia’ina i isi taaloga e tolu. A’o le isi tulaga e 91 ‘ai na sikoa e le Manu Samoa ae 102 ‘ai na sikoa e isi ‘au. E faaali mai ai iina o loo telē pea le galuega o loo feagai ma le faiaoga e tau saili ai se fofo e tipi ai ‘ai alu. A maua loa, ona mautonu lea o le auai o le ‘au i le tumutumu o le Taitoafitu. O le vaiaso fou o le isi vae o le taamilosaga i Singapore.

O Fiti ua pale i le siamupini i Hong Kong ina ua manumalo ia Farani 21-7. 

Tuufaatasiga o ai Sefulu muamua 

USA 130 pts 

Fiji 123

New Zealand 118

South Africa 99

England 90 

Samoa 74

Australia 70

Argentina 69

France 63

Scotland 55

E toe tolu taamilosaga o loo totoe.