O se tasi o alo o le atunuu ua leva ona galue i totonu o Samoa i le Misiona a le Autalavou mo Keriso (Youth for Christ).
Sa faapitoa lava lana auaunaga i le itu o a’oa’oga o le faatinoina o Pese Faitaga (performing arts), le hip hop ma le skits, e pei ona ua a’e mai tele i nei vaitau.
O le malaga ane a le susuga a Apelu i Niu Sila, ma faamautu ai i Aukilani, na ia maua ai le avanoa e toe faalauteleina ai lona tomai faalea’oa’oga i ia lava vaega o pese ma siva faitaga.
E pei la ona ia toe ulufaleina ai le a’oa’oga o tomai faapitoa i Aukilani, ma ia faamanuiaina ai i faailoga e pei BchCa, Dip PA, CTESOL, NCComp, CBAd.
Ua tele nisi o atunuu eseese o le lalolagi ua faimalaga atu i ai le susuga Apelu ma faatinoina ai le tele o semina ma faatamaoaigaina ai le toatele o tagata, aemaise lava o tupulaga talavou. O lona malaga mai la i Sini, o le fia faataunuuina foi o ana polokalame faasemina nei, e pei la ona faataunuuina ai i le Aso Toonai, aso 6 Aperila 2019, i le pitonuu o Mt Druitt. Na molimauina e le toatele o le atunuu lenei polokalame, aemaise faafeagaiga ma o latou faletua o le ekalesia AOG ma le toatele o le tupulaga talavou.
O loo iai pea le faamoemoe o le susuga Apelu, e faasolosolo pea ia semina mo tupulaga o Samoa i Ausetalia, aemaise foi o nisi atumotu o le Pasefika.
