E fesoasoani tusi faitau i fanau ma mātua i totonu o aiga

O le tāua ma le manaomia o tusi faitau faa-Samoa i totonu o aiga, o se faanaunauga lea o le faletua ia Talalelei Misikopa i le taimi nei, e ala i lana auaunaga i le Family Success Matters i Manukau i se taimi e sili atu ma le 10 tausaga. E lē gata ina maitauina i lenei vaitaimi ae faapena foi i ni tausaga se tele sa galue ai lenei tina i totonu o aoga faataitai i le tuanai. O se lu’itau lea sa faaosofia ai le lagona fia taumafai o lenei tina ia tusiina ni tusi talafeagai mo alo ma fanau laiti mai le pepe seia oo i le lima tausaga. O le taimi tāua lea i le atina’eina o le faiai laititi o le fanau a’o laiti lava i latou. E lē gata e tāua mo le tamaitiiti ma lona olaga atamai, ae faapena foi ona fesoasoani tele i le galuega a mātua i totonu o aiga. 

O tusi faitau mo nai fanau laiti, o se alaga’oa lelei lea e faaaogā e mātua, e atiina a’e ai lo la sootaga mafanafana ma le tamaitiiti mai lava i lona faatoa fanau mai. E mautu ai le fesootaiga lelei a le tamaitiiti ma lona matua o loo vaaia lona saogalemu i totonu o le aiga ma le tele o le aso. E fesoasoani e tapue ai faamalama o alaga’oa o le faiai o le tamaitiiti mai lava i lona tausaga pepe. E faamatala ai faamalama o le faiai o se galuega e tatau ona fai i totonu o le tolu tausaga muamua o le olaga o le tamaitiiti.

E faafilemu ai lagona faanoanoa o le tamaitiiti ma’i, poo se fanau e iai ni ona uiga faigata i lona tuputupu a’e. E fesoasoani e taofi ai le ita o le tina poo le tamā i le tamaitiiti, ae maua ai le ‘ata ma le lagona fiafia ina ia saogalemu le fanau. E atiina a’e ai le fiafia o le tamaitiiti e faitau tusi i lona olaga pe a matua. E faaosofia ai le fiafia o le matua e faitau faatasi ma lona alo. O se galuega faigata lea ona faatino e nisi o mātua mo a latou fanau ae tumu i le tāua.  

Ua tele suiga ua iai lenei vaitaimi, ma ua saoasaoa foi le malamalama ua oo i ai lenei talutalu fou. Ua tele ina tatou faaaogāina telefoni feaveai, ipads, ma le matamata TV, e faanofo filemu ai le fanau, ona pule lava lea o le matua i lana galuega o loo fai. E lē gata ina lē talafeagai mo le saogalemu o le tamaitiiti, ae misi atoa ai le talanoa o le tamaitiiti ma lona matua, o se fesootaiga o loo manaomia ona faafailele ma tapu’e i taimi uma.

I le auaunaga faa-Social Work a le Family Success Matters mo aiga, alo ma fanau i Manukau, e manaomia tele ai tusi faitau se tele ma talafeagai e faataunuu ai lea auaunaga. O le tele o taimi e asiasi ai Talalelei Misikopa i aiga, e vaaia ai le leai o ni tusi faitau e ono fesoasoani i le a’oa’oina o tamaiti laiti nei. E lē gata i totonu o tatou aiga Samoa, ae faapea foi i aiga Pasefika lautele o loo galue ai.

O le tausaga 2017, na ia tapenaina ai se tusi ua faaigoaina – “Ia Ola Aoaoina” mo le fanau laiti e fai ai se galuega fesoasoani i totonu o aiga. I le 2018, sa amata faaaogā ai loa lea tusi e aiga, aoga faataitai ma faletusi. 

O le tusi o loo tusia i le Gagana Samoa ma le faa-Peretania, ina ia faalautele le a’oa’oina o le gagana a fanau laiti. E faigofie foi lona faaaogāina e mātua ma le tamaititi ina ia aua ne’i lavelave ma faaoso ita i le tamaiititi o loo naunau e faitau. O loo faavasegaina le tusiina o ata ma upu o lenei tusi e le alafapeti faa-Samoa e pei ona tatou masani ai. O nei tusitusiga uma o se auala faigofie ua mafai ona momoli atu ai i mātua ni auala lelei e lagolago atu ai i le galuega a mātua e ono fesoasoani ai i le ola a’oa’oina o fanau e ala i le faitau tusi.

Ua tele mātua ua latou lagona le tāua o le feau taulogologo o loo tuuina atu e lenei auaunaga, aemaise lava i aiga Pasefika. Ua latou molimauina le tāua o le tele o le taimi o mātua e tuuina atu mo a latou fanau, ina ia tapue faamalama o alaga’oa o le faiai o nai tamaiti, e ala i le faitau tusi. Ua avea foi lenei auaunaga i tusi faitau e ala atu i le Family Success Matters, e faaleo mai ai ni lagona fiafia o mātua, i le tāua o le toe foi e faaaogā le faitau tusi faatasi ma le fanau. Ua latou molimauina ai foi le saosaoa o le gagana tautala a le fanau a’o laiti lava i latou. E lē gata i lea, ua fiafia ai foi mātua e talatalanoa ma le pepe poo le fanau laiti. Ua mafai ai ona latou pesepese ni pese faigofie faa-Samoa ma isi gagana Pasefika e saga faalautele ai le gagana a le fanau.

Talu ai le matuā tāua o le galuega a mātua mo nai fanau laiti i totonu o aiga, ua naunautai ai le faletua ia Talalelei Misikopa, e faaliliuina lenei tusi i isi gagana, e tali atu ai i le manaoga o loo tuuina mai e faletusi ma aiga. Tau ina ia alofa le Atua ma faamanuia mātua ma le tapueina o nai a tatou fanau laiti i totonu o aiga, e ala i le faitau tusi faatasi.