Samasoni Maoga ma Bill Roxburgh i le amataga o le 10km Aau i le masina ua tea i Saoluafata - Photo: Samoa Events

Samasoni Maoga ma Bill Roxburgh i le amataga o le 10km Aau i le masina ua tea i Saoluafata – Photo: Samoa Events

O loo tapena le alii talavou o Samasoni Nimarota Maoga mai le afioaga o Leusoalii mo taaloga faapitoa o le Pacific Games i le tausaga fou. O le a saili avanoa ai o ia i le ‘au Triathlon a le atunuu i tauvaga a le Pacific Games i Apia. E lē o se mea fou lenei taaloga ia Maoga.

O ia o se tagata e agavaa tele i le triathlon, o le Swim, Bike, Run poo le Aau, Uila ma le Tamoe. Ua atoa nei le lima o tausaga o tauva Maoga i triathlon i totonu o Samoa ae e lei maua lava ma sona avanoa e tauva ai i atunuu i fafo. O taaloga a le Pasefika o le a faia i Samoa o se avanoa lelei lea mo Maoga e faailoa ai lana taleni.

O le malosiaga lava a Maoga i nei taaloga o le aau. E matua saoasaoa ma malosi tele lana aau. E le gata i le aau lalata a’o le mamao foi. O le tausaga 2017 na auai o ia i feausiga mai Upolu i Savaii. Ua faalua foi ona alu i tuuga mamao e tai 10 km a le Samoa Events.

O le masina na tea nei foi na tauva ai o ia i le 10km aau na fai i Saoluafata. O se mea fua ia Samasoni le aau. O le luitau mo ia o le vili uila. Ona o le leai o se uila e patino mo ia o le faigata lea o lana toleni mo le triathlon. O taimi uma e toleni ai e faanoi ai e ia se uila mai isi o le triathlon e faaaoga ona toe ave lea. Peitai, e lē o fai ai lea ma faaletonu i lona naunautaiga e maua sona avanoa lelei e tausinio aim o le atunuu.

E lelei le tamoe a Samasoni, o le isi lea itu malosi o lana taumafaiga. O ia o le tagata Samoa muamua lava na tauva i le malafoni a Savaii, 2016. Ua tele foi ‘afa malafoni ua tausinio ai o ia. Ae o le luitau mo Samasoni ona o le pupuu o le triathlon o le a fai i le Pacific Games. E na’o le 750mita le mamao o le aau. E ao ona mua Samasoni i le tuuga lea, ona sosoo ai lea ma le 20km o le uila. O iina o le a see ai i tua auā e malosi tele le vili a tagata mai atumotu o Farani Polenisia (French Polynesia). E malosi foi Fiti, Solomona ma Papua Niu Kini i le vili uila. O le tamoe e na’o le 5km. O le lalata o le tuuga o le a suia ai le toleni a Samasoni ina ia taumafai e televave lona taimi tamoe.

E ao ona ausia e ia le taimi o le 1 itula ma le 10 minute o vae uma ia e tolu, ae o le taimi nei e ova ma le 1 itula ma le 25 minute. O lona uiga e fai lava si tele o le galuega o loo feagai ma Samasoni ae e lei oo i le Pacific Games 2019.

Ae e iai le avanoa e fua ai lona malosi mo le 2019, auā o le masina o Tesema o le a fai atu ai i Samoa le Pacific Island Triathlon Championships, o le a malaga atu ai atumotu uma a le Pasefika e iai Fiti, Niu Sila, Papua Niu Kini, Tonga, Solomona ma Vanuatu. O le a faataitai ai ma le malae taalo mo le Pacific Games 2019.