O le Aso Lua o le vaiaso ua mavae i le falemaliu o Sefo i Motootua sa tuuina atu ai le fesoasoani a le ASA Foundation mo Salvation Hicks, 3 masina le matua na uma loa ola i le faama’i o le misela. O le fesoasoani sa tuuina atu lea i ona mātua le tama ia Tupu Hicks ma lona tina ia Lisa Hicks, o le pusa maliu e teuina ai le tino o le fanau faatasi ai ma le pili o le falemaliu.
O le fesoasoani lenei a le ASA Foundation ua i le vaiaso lona valu lenei talu ona faatino mo ē ua maliliu ona o le faama’i o le misela ma lona pepesi ai i lo tatou atunuu. O le tofa Teleai Edwin Puni sa fai ma fofoga o i latou ua ofo le soifua e galulue fua mo le faamaopoopoina o fesoasoani mai tagata o loo aumau i Niu Sila le ASA Foundation. E ui ina lei vaai ma pa’i atu i le fanau ua avea le ola, ae o lagona tiga o le alofa, sa vaaia i lea taeao, ina ua fetalai Teleiai e faaoo le galuega a le ASA Foundation…..
“Tupu ma Lisa, ua maua tala ua maliu lo oulua alo, o faamaisega a le ASA Foundation ona o le fanau ua avea i le faama’i, e lē mafai e sa matou tala ona aveesea le loimata maligi ma le mafatia ia te oulua, ae ua na’o se fesoasoani, e itiiti ae ia avea o se fesoasoani i o lua mafatiaga, e talavou lo oulua aiga, e lē faigofie le lagona pe a avea le fanau, ae o lea ua tapena mai e le ASA Foundation mai Niu Sila, e ala i le fesoasoani a i latou na alolofa mai le pusa maliu faapea ai ma le pili o le falemaliu mo Salvation.”
O le tamā ia Tupu Hicks 28 tausaga o le soifua mai Matautu uta, na tali mo le fesoasoani, sa molimauina foi foliga o le faanoanoa, pei o se tagata o loo amo se avega e mamafa, ma ua loa foi ona mafatia, e tau faatali foi se tala, ai ona o le faamalosi atu o fesili a le autusitala na mafai ai ona matala mai nisi o lagona o le mafatia.
“O nisi o tamaiti o lo matou aiga na pesia mai le faama’i a’o iai i Nofoalii, lea sa mafua ai ona pesia Salvation, e faigata ona faagalo pe a manatu i tiga o le fanau ma le tele o taimi sa aumai ai i le falema’i, ae mulimuli ane ua lē toe aogā i ai se togafiti, ona na fai mai foma’i Ausetalia ua tuai ma ua lē mafai ona togafiti le siama ona ua o faatasi ma le nimonia.”
O le polokalame a le aiga o Tupu ma Lisa o le a malaga atu i Savaii i Fagaee mo le teuina ai o le tino maliu o lo la alo, ma o le aso 14 o le a fai ai le sauniga faaleaiga o Salvation, ae o le vaa usu i le aso 15 o le a malaga atu ai i Savaii.
Na amata taofia mai Salvation i le falema’i o Tupua Tamasese Meaole i Motootua i le Aso Gafua 23 o Tesema,2019, ae Aso Lulu o le vaiaso lava lea, le Kerisimasi, ae na uma lona ola i le aso 2 o Ianuari o le tausaga nei. O Salvation Hicks o se tasi o le fanau e toalima a Tupu ma Lisa Hicks, sa faaalia e le tamā e faafā na avatu lona atalii i le falema’i peitai sa faapea mai e ave i le fale e lei iloa mai āuga o se misela.
O le faamatalaga a le tama o laua e masani tele i le faama’i o le flu ma le tale i fanau ma o āuga ia sa vaaia ia Salvation peitai, e ese mai lava mai le flu masani ona ua tigaina tele. O lona fa o taimi na oo atu ai i le falema’i na faapea mai ai loa o lea ua sasao mai le misela, ae aua le popole ave e faainu vai. O le taimi mulimuli na oo atu ai i le falema’i ina ua vaai atu lava ua tulaga ese si ona atalii, ma faapea mai ai loa ua lavea i le niumonia.
Sa fesiligia i laua e le foma’i mai Ausetalia sa vaaia lona atalii, pe aisea ua tuai ai ona avatu, e lei mafai se tali ona o le mafatia tele, pe a mafaufau ua fafia ona auina atu si ona atalii i le falema’i e leai lava se tala e tatau loa ona taofia.
