Ua togi le lu’i a le Palemia le Susuga Tuilaepa Lupesoliai Sailele Malielegaoi i le sui Faamasino Sili i le faaaogāina lea o le Gagana Samoa i le tusiga o faaiuga faafaamasino, poo galuega faafaamasinoga, e aunoa ma le toe faaaogāina o le Gagana Peretania.
O le lu’i a le Palemia, na fai lea i le aoaoga mo le taimi muamua e toe faaiila ai tomai faafaamasino o afioga i alii ma tamaitai faamasino o le Faamasinoga o Fanua ma Suafa i Mulinuu.
O le saunoaga a le Palemia, ona na ia faaalia ua leva ona pasia e Tofilau i le Kapeneta le faatāuaina o le gagana Samoa, lea na ala ai ona faatino le faatonuga a le Kapeneta, o soo se sauniga lava e faia a le malo e faatino i le gagana Samoa.
O loo manatua foi e le Palemia, o le taimi foi na faatonu ai faauluuluga o matagaluega a le malo, ia tusi atu ni a latou fautuaga i mataupu i totonu o le Kapeneta e faaaogā ai le gagana Samoa peitai, na avea lea ma tulaga ua matuā sapasui ai le gagana.
“O la’u lu’i la lea ia te oe le sui Faamasino Sili, pe mafai ona faaaogā le tatou gagana e tusi uma ai a outou faaiuga, ma aveese ai na mea o faaliliu upu ma le tele o le gasu, ma tupe alu e totogi ai, a mafai ona e faia ua lelei tele lea.”
Saunoa Tuilaepa ua tatau ona mulimuli Samoa e pei o isi atunuu i fafo, o atunuu i fafo e faatino lava i le gagana peretania a latou faaiuga, faaaogā le gagana peretania ia latou fesootaiga, aisea auā o le latou gagana lena, e lē o se gagana a Samoa, o le latou gagana lena o aso uma, aisea la le mea e sui ai fua tatou, ua tatau ona ave le tatou faatāua i le Gagana Samoa.
O le tausaga na tea nei na faalauiloa aloaia ai e le Ofisa o Aoga, le faatuina o se komiti faapitoa latou te iloiloina le faaaogāina o le Gagana Samoa. O le komiti foi lea na agai e toe iloiloina le soona faaaogā o faailoga i upu Samoa, ma o le soona faaaogā ua sese ai le faaleoina o upu Samoa, ua avea foi ma mafuaaga ua nenefu ai le fanau aoga i le faaaogāina o le gagana Samoa. O fuafuaga a le komiti o Gagana Samoa o le tuufaatasia lea o se tusiupu, poo se lomifefiloi faa-Samoa, e faailoa ai le faaleoina o upu Samoa.
O le tusiupu foi lea e faailoa ai le faaaogāina sa’o o faailoga upu, o upu e faaaogā ai le koma liliu poo le faamamafa upu. O le tusiupu foi lea o le a faaaogā ai faaupuga sa’o e ao ona faaaogā i mataupu tau faamasinoga.
O loo galulue nei i ai le matagaluega o aoga e faatino lea galuega.
