Ua faataga asiasiga i le lotoā a le Toomaga, le alii faasalalau o le KVZK mai Amerika Samoa, na asia le Toomaga, Andrew Earnest Thompson, ma fanau o iai faatasi ma le afioga Siliniu Lina Chang

E oo mai nei lava e leai ma se tamaitiiti o fanau sauaina a Samoa o loo tausia ma vaavaia e le Toomaga mo ē Puapuagatia i Tuanaimato, na aafia pe pisia foi i le misela.
E pei ona talanoa ai le afioga i le Peresetene, Siliniu Lina Chang, e lei faigofie le galuega na latou faia, e ala i le puipuia mai lava lea o le tusa ma le 81 tamaiti nai le lotoā o le Campus of Hope. Talu mai lava Oketopa i lona aso 20, o le tausaga talu ai, na faia ai tuipuipui o le misela o tamaiti. Ma tapunia ai loa ma faitoto’a o le fanua, e lei toe faatagaina lava ma se tagata ona toe ulufale i le lotoā.
E oo lava i le aufaigaluega, na faia uma lava tuipuipui o le misela, ma amata ai foi ona faaitiitia le aufaigaluega mo se taimi lē tumau. Ua taofia ona toe oo ane le aufaigaluega e iai a latou fanau i le lotoā, ae ua taumafai foi ina ia faatumauina pea le aufaigaluega na galulue ai i lea taimi umi.
Peitai o tulaga tau i mea taumafa mo fanau, o vai ma manaoga o aso uma, sa lava tapena lava i ai, vagana ai isi fesoasoani sa faaoo ane i le ofisa i Apia ma molimoli atu ai i le lotoā. O aga uma ia o le puipuiga lava ma le aputiputiga o fanau, e aofia ai ma fanau e iai manaoga faapitoa lea o loo i lalo uma lava o le vaaiga a le Toomaga mo ē Puapuagatia.
Peitai o le taimi lava na faataga ai ona feoai tagata ma toe faataga ona faia mafutaga i le masina talu ai o Tesema, na maua ai foi ma le avanoa o members o le Toomaga, poo totino o le Samoa Victim Support Group, e fesoasoani ai i le tau faamamāina lea o le vaega i le lotoā.
E ala i le ave lea o isi tamaiti i tua e faatafafao ai i tauaiga o le Toomaga poo sui auai foi o le faalapotopotoga.
Molimauina foi le taufai lolofi atu o asiasiga i le lotoā, talu mai lava le taimi na tatala ai le sā ma faataga le atunuu ma mātua, ae o aulotu ma faalapotopotoga, aemaise o tagata taitoatasi. E oo lava i aiga mai atunuu mamao, ma tagata mai le motu i Sasa’e o Amerika Samoa.
Na talanoa foi le Peresetene, Siliniu, sa iai le manaoga e aveese atu tamaiti nei ma Samoa mo le puipuiga lava, faapei lea o le avatu i Amerika Samoa. Peitai ua iai foi isi aiaiga na lē taunuu ai lena faamoemoe.
Peitai e lē o tuua ai lava le faamoemoe ma le manaoga o le pulega ia malaga atu lava fanau nei i se taimi oi luma i Tutuila mo se tafaoga. Peitai na molimauina foi e le Susuga Andrew Earnest Thompson o Matuu Amerika Samoa, le maeu o le tausiga ma le malupuipuia lea o fanau sauaina a Samoa, ma ia momoli foi le faafetai i le pulega, aemaise o le afioga i le Peresetene, i lana ta’ita’iga malu, ua sao ma uli ai le sa o le Toomaga mai sauaga a le misela.
Ae i se tala lata mai, i faamaumauga o tagata ua aafia i le misela, e oo mai i le taimi na tuufaatasia ai lenei lipoti, ua tusa ma le 5,697 tagata na aafia ma faamauina aloaia. Ae ua faaitiitia lava le aofai o tagata aafia, e pei ona faamauina le na’o le 30 tagata na aafia mai ia Tesema 29, 2019 seia oo ia Ianuari 5, 2020.
E oo mai i le aso 5 Ianuari 2020, e na’o le 16 ma’i misela o loo taofia i le falemai tele o Tupua Tamasese Meaole i Motootua, e aofia ai ma tamaiti e toafā o loo tigaina. Tusa ma le 1,860 ma’i na taofia i falema’i mo togafitiga, e 1,761 na togafitia ma manuia. Poo le 85 pasene o ma’i na togafiti ma malolosi.
Peitai e oo mai nei ua faamauina le oo atu i le 83 tagata ua maliliu, e aofia ai ma le toalua, o le tamaitiiti ma le tagata matua, na maliliu i le va o le aso 29 o Tesema 2019 ma le aso 5 o Ianuari 2020.
Ma ua leai foi se toe faamalosia o tuipuipui o le misela mo tagata malaga i Niu Sila ma Ausetalia, faapea le malo tele o Amerika, vagana ai Amerika Samoa.
Ae mo le lotoā ma le apitaga o le Toomaga mo ē Puapuagatia, ua faapena foi ona tatala i asiasiga mai fafo ma le atunuu, e pei ona saunoa ai le susuga Siliniu Lina Chang.