O le tamaitai Palemia o Niu Sila, Jacinda Ardern ua faalupe i ai le suafa tāua o le ‘Tagata Pasefika o le Tausaga’ (Pacific Person of the Year) e pei ona faaigoa ai e le mekasini o le Islands Business.
Ua faato’ā faalua ai i le tamaitai Palemia nisi e leai ni tupuaga Pasefika, ae ua mafai ona ave i ai lenei faaeaea, e pei ona faalupe ai foi faapena le alii na avea i se taimi ua tea ma Palemia o Ausetalia, le susuga John Howard.
I se faamatalaga i le RNZ o loo faaalia ai se manatu o le faatonu o lea mekasini, le susuga Samisoni Pareti, na ia ta’ua ai, o tausaga taitasi e taumafai lana auaunaga e mata’ituina galuega faatino a tagata taitoatasi, poo se faalapotopotoga foi e telē se aafiaga lelei e maua ai e le Pasefika.
Saunoa Pareti, ua talafeagai lelei lenei faalupega o le 2019 mo le tamaitai Palemia o Niu Sila, ona o ana galuega ma taumafaiga fitā sa faia i le Fonotaga a Atumotu o le Pasefika, ina ia mafai ona taufai malilie ma galulue faatasi ta’ita’i o atunuu uma o le Pasefika i le mataupu tāua o loo iai nei, o le suiga o le tau.
O tomai sa faatino ai galuega ma feutana’iga na faia e lenei tamaitai na matilatila ai le maoa’e o lona silafia, o tomai e feutagai ai ma ta’ita’i o malo eseese aemaise foi i ona uiga to’afimalie sa faatino ai ona tiute, na telē se aogā mo atunuu ma ta’ita’i o atunuu o le Pasefika.
Na matuā viiviia foi e ta’ita’i o atunuu uma o le lalolagi le auala to’afimalie ma le faatamalii na taulima ai e le tamaitai Palemia le faalavelave na tulai mai Kalaiesetete ina ua osofai e se tagata faatupu faalavelave le nofoaga tatalo o tagata Mosalemi ma maliliu ai nisi. O inā, e pei ona ta’ua e Pareti, na matuā iloga mai ai tomai o lenei ta’ita’i, ma amata ai loa ona latou mata’ituina mai ai lava le faatinoga o galuega a le tamaitai Palemia, e lē gata i le taulimaina o faafitauli e tulai mai vaega eseese o le atunuu, ae i totonu lava foi o lona ia itumalo faapalota.
Saunoa Pareti, o le tulai mai o Ms Ardern i lenei tofiga maualuga, ua faatusa i le mānavaina o se ‘ea fou ua faafouina ai i le tulaga o mataupu tau ta’ita’i faapolotiki i totonu o faigamalo a atunuu o le Pasefika.
O Ardern o se Palemia e talavou lona soifua, o se tamaitai, ma o se tina foi.
E mautinoa ua iai uma ia te ia tomai ma agavaa o loo momoo uma i ai isi tamaitai poo isi uma tagata talavou o loo fia ausia foi lea tofiga maualuga o le avea ma taitai o se atunuu, i totonu o le Pasefika.
O se tagata, e nofosauni e faalogologo lelei a’o faaali atu manatu o isi, e nofosauni i taimi uma e faia ana faaiuga ma filifiliga atamai, ma taumafai ina ia faaaofia ma tuufaatasia uma tagata eseese.
O nisi o ta’ita’i sa latou muai maua foi lenei faalupega o le ‘Tagata Pasefika o le Tausaga’ na aofia ai le Palemia o Fiti, Frank Banimarama, faapea le Palemia o Tonga lea na tuumalo talu ai nei, o ‘Akilisi Pohiva.
