O le auga ma le faamoemoe o lea faiga paaga e pei ona saunoa le Peresitene o le SNYC, ina ia galulue vavalalata ai le Matagaluega ma le Faalapotopotoga, auā le faatautaia o poloakalame, aemaise o le unaia o tupulaga talavou i le faatinoina o atinae auā se lumanai manuia.
Na faaalia foi e le tamaitai Peresitene o le Faalapotopotoga e faapea, o le faiga paaga lava lea a le Matagaluega e tau ala mai i le Vaega o le TALAVOU ma le Faalapotopotoga e vaavaai ai vaega aogā, aemaise o polokalame e unaia ai olaga atinae o tupulaga talavou o le atunuu.
Na ta‘ua foi e Jennifer e iai nisi o polokalame e pei o le fefaasoaa‘i o tupulaga i soo se mataupu e mautinoa e siitia ai le soifua atinae aemaise o le soifua galue o le tupulaga, auā le atinaeina o lona aiga, aemaise o le fesoasoani lea i le atinaeina o le tamaoaiga o Samoa.
O tupulaga o le faamoemoega lea o soo se atunuu, ina ia tulai mai e faatino soo se atinae e faaleleia ai lona atunuu, o le faaopoopo lea a le Susuga i le tamaitai Peresitene.
E ui ina eseese matafaioi a le Matagaluega ma le Faalapotopotoga e pei ona ta‘ua e le Peresitene, peitai o le sini ma le faamoemoe, ina ia ausia le faamoemoe e tasi, o le atinae lea o tupulaga o Samoa.
Na momoli le agaga o le faafetai a le Afioga i le Minisita, i le Peresitene aemaise o le faalapotopotoga, ona o le tofa loloto aemaise o le latou naunautaiga ina ia atiae tupulaga talavou a Samoa mo a taeao.
E pei ona faaali e le Afioga i le Minisita e faapea, e mo le silafia o loo iai foi le pitolaau o loo galulue faatasi ai le Matagaluega ma Alii ma Faipule o soo se afioaga, auā le unaia lea o tupulaga i totonu o soo se afioaga.
Ua mae‘a foi ona faataoto tulafono ma aiaiga e puipuia ai le faatinoga o galuega, auā lava le siitia atili o polokalame e faatino mo tupulaga. E iai polokalame o loo faagasolo i totonu o afioaga taitasi, e lē gata o totonu o Upolu ae faapea foi i le motu tele i Salafai.
O le tausaga faatulagaina o soo se tulaga talavou e aofia i lalo o polokalame pe ta‘ua foi o le talavou, o le 18-35 tausaga le matua.
O le sailiiliga na faatautaia na faailoa ai e faapea o le 52% o le faitau aofai o Samoa e i le va o le 15-35 tausaga le matuatua, e aofia ai le 52% o alii ae 48% o tamaitai.
I le saiiliiliga lava lea e pei ona faaalia, le toatele o tupulaga e agai ese atu ma Samoa ona ua faamanuiaina e Quota poo le polokalame foi a le Malo o loo faagasolo e faigaluega ai faavaitaimi i Niu Sila.
Ua mae‘a ona sainia le feagaiga ma o le a alo atu le Matagaluega ma le Faalapotopotoga, auā le faafoega o polokalame, mo le atinae o tupulaga talavou o Samoa.
