Maoa‘e tapenaga mo Taaloga a le Taupulega

O le Aso Tofi 14 Ianuarti 2015, na feiloai ai faauluuluga o Taloga taitasi ma sui o le Ofisa autu o Taaloga i le atunuu, o lenei faamoemoe auā lava le tapenaina o taaloga mo le Taaloga a Taupulega o latou talavou ua faamoemoe e faia mai ia Setema i Samoa.

O le manulauti o loo ave i ai le faamuamua mo taaloga taitasi, o le manumalo lea i Pine auro o lea foi vaega maualuga o Taaloga i totonu o le lalolagi.

E lē o se taimi muamua lenei ua auai Samoa i lenei taaloga, ma o loo molimauina foi le maualuga o le tulaga na mafai ona ausia, e lē gata i le taaloga Netipolo, o le lakapi, soka ma faipelega. O le Aso Faraile 15 Ianuari 2015, e mautinoa ai siamupni o paga taitasi i le ipu ‘utu o le Kamupani a Frankie lea e faagasolo pea i faaiuga o tausaga uma.

E $10,000,00 se tino i tupe e faamatuu atu e lenei kamupani agalelei i le Faalapotopotoga o fusuaga le S.A.B.A. auā lava le fia atinaeina o fusuaga i totonu o le atunuu. E 3 maea fusu na mafai ona tauva i le sailiga o le siamupini o le Ipu a Frankie, e pei ona faataunuu ai i Tuanaimato i le faaiuga o lena vaiaso.
Ua sola nei ma le maea fusu a Tumua ma Pule lea e Peresetene ai le tofa ia Tapusoa Fifitita, tulua le maea fusu a le Marist o loo Peresetene ai Luafalealo Ah Ton, ae tulaga 3 Savaii e na o le toatolu na mafai ona auai mai i lea faamoemoe.

O le maea fusu a Faiaoga ma Faatonu sa faamoemoe e 4 ai maea fusu o lenei tauvaga, na toe faapalafa teisi i tua e lei lava se taimi e tapena ai mo lenei faamoemoe, a ua faaalia o le sailiga o le au mo taaloga a tupulaga talavou, o le a tapena sa latou au malosi e pei ona fetuunai nei ma le afioaga o Afega, e fia faatino ai fusuaga i Aso Toonai taitasi.

Ua faaalia foi e le Peresetene o fusuaga a Samoa, le tofa ia Togatalima Faafouina Milford, o le masina fou o le a amata faagasolo ai fusuaga a maea taitasi auā le sailiga o tama i lalo ifo o le 18 tausaga e sili ona lelei mo taaloga a le Taupulega, faapea foi ma le vasega o tama fusu matutua auā se ‘au a Samoa e sii atu i Taaloga a le Pasefika ua faamoemoe e faia i Papua Niu Kini.

Ia talosia ia le faamoemoe o latou o loo faafoeina taaloga i le atunuu, ia maua se ‘ai o Samoa ma siitia foi lona tulaga i itu tau i taaloga.