O le susuga ia Papalii Li‘o Ta‘eu Masipa‘u, o le afioga Lealailepule Rimoni Aiafi ma le afioga ia Aveau Niko Palamo, o sui ia o le Tautua Samoa na faaauau le tetee i le amataga o lenei vaiaso i teuteuga o le Tulafono o Penefiti mo tagata faisaofaga e Maliliu a le NPF.
O le tulafono lenei ua mautu ai le maua o le $5000 tala Samoa e le sui faisaofaga ua faapea ona totogi le NPF, ma o le mae‘a o le masina atoa talu ona totogi le NPF a le fai saofaga e sao atu ai loa ma aofia i lenei faamanuiaga.
O le suiga poo le teuteuga lea ua talanoaina o le tuu atu le totogi o le NPF a le faisaofaga i le lua tausaga. Faaalia e le alii Palemia o le NPF lava ia na ala ona fai ina ia litaea le tagata faigaluega ua iai se Faaputugatupe e tua i ai i lona matua, ma e lua lava vaega e filifili i ai le faisaofaga pe tala uma i tua lana Faaputugatupe lea i le taimi e litaea ai pe o le a auai le totogiga ona pei lava lea o loo totogi e lana fale faigaluega sa iai lona totogi masani.
O se faiga na ta‘ua e le NPF o le a aogā tele mo le tagata matua ua mae‘a lana tautua i le atunuu ae o loo maua pea lea faamanuiaga.
E ui o lea e tele isi faamanuiaga e mafai ona maua e le tagata faisaofaga e aofia ai la le tupe lea e maua e lona aiga pe a maliu e $5000.
O le mau a sui o le Tautua Samoa e tatau i le malo ona toe iloilo pe lē ua umi tele le taimi e totogi ai le NPF a le tagata ona faatoa maua lea o le faamanuiaga o lea lava ua maua i totonu o le masina lea e amata ai ona faaputu le tupe a le tagata faigaluega.
O le fautuaga a le isi sui ia Toeolesulusulu Cedric Schuster, pe lē mafai ona toe vaavaai le malo e tuu atu i le ono masina e totogi ai le NPF ona mafai lea ona ofi i totonu o lenei faamanuiaga le tagata faisaofaga.
A lē o lea, faaalia e Toeolesulusulu taumafai i le tausaga atoa ae o le tuu atu i le lua tausaga, e faigata tele auā e iai nisi e ono maliliu lava e lei maua lenei faamanuiaga pe afai o le umi lea e faatali ai.
O lea ua toe tuu atu le teuteuga i le Komiti o Tupe Maua a le Palemene auā le faatalatalanoa mo le isi tolu masina ona toe aumai lea mo le faamautu o se tali, ae na ta‘ua e le alii Palemia e aogā tele le taimi lenei e faatalanoa ai lenei mataupu auā e moomia lava le faamalosia o nei suiga e le tulafono.
