Ina ua uma le fiafia sa faia i le malaevaalele i Aukilani i le aoauli o le Aso Tofi i le faamanatuina o le 20 tausaga talu ona fealuai le vaalele o le Air Tahiti Niu i le va o Niu Sila ma Tahiti ae o le aso na sosoo ai i le Aso Faraile na toe feiloai ai Niu Sila, Samoa, Niue ma Rarotonga i le sainia lea o le konekarate ua faaigoaina o le Manatua Cable Project.

Ua talafeauga lelei la le sainia o lenei konekarate ma le faamanatuina o le 20 tausaga o le vaalele lea a Tahiti ma ua maua ai ma le avanoa lenei e valaaulia ai nei atunuu o le Pasefika e auai e molimauina lea faamoemoe.

O le aso foi lea sa mimita mai ai le afioga i le Peresetene ia Fritch i le latou vaalele fou o le luxury Dreamliner le Farakava, lea o le a fealuai i le va o Niu Sila ma French Polynesia. Ta’ua e lea peresetene toe tolu a latou vaalele fou lea ua fuafua e tuuina mai e feaveai ai nisi o latou tagata ma le latou mau e faapea e tāua tele nei vaalele mo le latou galuega o loo fai ina ia mafai ona faatosina mai ai le tele o turisi mai atunuu mamao e omai e faaalu a latou tupe i totonu o French Polynesia.

O le feiloaiga o atunuu nei e fa o le Pasefika, na faamanino lelei ai foi e nisi o kamupani eseese faapea nisi o aufaigaluega a malo lea o le a alo atu e faatinoina lea poloketi, le faatinoina o lea faamoemoe o le a agai iai i le lumanai.

O le poloketi lenei, o le poloketi e sosoo ai le cable mai Samoa e oo i Tahiti, ma vavae ai se vaega e oo i Niue ma Rarotonga.

O se taimi muamua lea o le a oo ai lea cable i le va o Niue ma Rarotonga, ae o Samoa ua leva ona iai lea vaega, ae o se tasi lea vaega o loo taumafai iai tatou Samoa ina ia mafai ona vave ai pea fesootaiga.

E pei ona saunoa le afioga i le Minisita o tagata atu motu o le Pasefika, na tuuina atu ai se mau iai latou o loo faatinoina lea galuega, o le’a lagolago e le malo nei fesootaiga i ona po nei, ina ia mafai ona fesootai tagata o atunuu eseese ise tau taugofie. Ina ua mae’a feutagaina ma saunoaga o le aso, ona faatinoina loa lea o le sainigalima e pei ona aofia ai nei atunuu e fa o le Pasefika.

O le malo o Niu Sila o loo latou tuuina atu se vaega tupe e fesoasoani ma lagolagoina ai nei galuega, ae o le tele o nisi vaega tupe o loo mafai ona faatinoina ma fesoasoani mai ai le World Bank.

O le afioga i le Minisita o Tagata Atumotu o le Pasefika ia Aupito Su’a William Sio sa fai ma sui o le Palemia o le malo o Niu Sila i lenei sainigalima, o ia foi sa faia le saunoaga faapitoa o le aso e uiga i le faamoemoe tāua o le aso faatasi ai ma le faatāuaina o le lagolago i nei polokalame, ma e faavae nei mea uma i le Pacific Reset.

E pei ona ta’ua e le Minisita, i lona lagona i le tāua o le Pacific Reset o le tāua o le galulue sosoo tau’au poo le galulue faatasi. E lē mafai ona o atu Niu Sila e faatonu atu le Pasefika i mea e tatau ona fai ae o le Pacific Reset e faavae i luga o le agaga faaleuo ma le agaga o tatou uma lea e sailiili le manuia mo le lautele o le atunuu ma le Vasa Pasefika.

O le afioga i le failautusi o le Kapeneta a Samoa ia Agafili Shem Leo sa fai ma sui o le Palemia o Samoa faatasi ai ma le Palemia a Rarotonga ma lana aumalaga, o le Palemia o Niue ma le Peresetene a Tahiti, sa auai uma i lea maliliega.