O aso faapenei e osooso ai ma mitamita le tamaitiiti sa faamaoni ma filigā, ae tutulu ai isi i le agaga fiafia, e tagi u’u ai foi le isi matua ona ua lē tau lau o le faamoemoe i se taumafaiga a fanau. O se vaitau ua amata faagasolo ai le seleseleina o saito sa lūlūina. E lē gata o a’oga a le malo ae faapea foi ekalesia, tulagalua, ekalesia ma Iunivesete.
Na faia le faauuga a le a’oga faaitumalo maualuga a Glenala i le Aso Tofi ua tuanai. O se tasi o a’oga e toatele ai alo ma fanau Pasefika aemaise lava o Samoa. O nisi foi o loo galulue ai o alo lava ma tamafanau a Samoa, le tofa ia Tagoiaega Bruce Manu Sione faapea Scott Tuiletoa o se tasi foi o auauna a le Atua i se tasi o ekalesia, aemaise nisi foi o Samoa ua lē māua o latou suafa. O le ala lea ua siisii atili ai pea ma laalaa i luma lenei A’oga ona a latou taumafaiga.
Na faia le faauuga o le Vasega 12 i le taeao sa faatumulia i le toatele o mātua Samoa faapea foi susuga i faafeagaiga sa auai atu e molimauina lenei aso faapitoa i fanau. O lē lava sa lūlū ma loimata ma le faamaoni, o lenei ua selesele foi ma le fiafia ma le olioli, ae o lē sa lūlū ma le faatamala, ua inu foi i le faatamala. E moni lava upu o le Tusi, “O le tama poto e faafiafia ai le tamā, ae o le tama valea e faanoanoa ai le tina”.
O le tasi lea o a’oga sa faia le laugatogi i le ao, ae faia le faafiafiaga i le afiafi. E tele mātua Samoa o loo putiputi ma puipui alo ma fanau mai le auai atu i mea faafiafia aemaise o taaga a tama ma teine o loo lolofi atu i Gold Coast. O le agaga o le matua Samoa ia tata’i ese alo ma fanau mai mea faafiafia nei, ae o loo faia pea a latou lava gaioiga e taofia ai tamaiti mai nei faafitauli.
