Solamalemalo Sakai ma Netina Maiava ma lo la alo ia Matalena Kathy ua atoa lona 21 tausaga

Solamalemalo Sakai ma Netina Maiava ma lo la alo ia Matalena Kathy ua atoa lona 21 tausaga

O le talitonuga o le tamaitai o Matalena Kathy Maiava na afua ai ona ia toe faafoi le Ki o lona 21 tausaga i nai ona mātua, e lē o tatalaina ai se faitotoa e ulufafo atu ai mai le mafanafana o le latou mafutaga ma i laua aemaise tuagane laiti e toalua o loo latou mafuta pea, ae e faatumauina pea.

Na ia filifili e toe faafoi lana ki i ona mātua o se faailoga o le ava ma le faaaloalo ia i laua ona o le tele o mea lelei o loo la faia pea. Fai mai Kathy, “Ia te au tusa lava pe tuuina mai le ki, pe o le 18, 21, 40 poo le ā le matua, ae o lo’u mafuta faatasi ma o’u mātua, o loo tele ni a’oa’oga tāua tele o loo o’u pueina ma maua mai ai.  O le manaoga o lo’u loto ia faasinoala i laua i o’u ala uma ina ia tata’i a’u i le ala tonu. O lea lava ou te laititi, ae o loo tele isi mea e ao ona a’oa’oina ma e tatau lava ona ou mauaina. E lē o faatopetope la la’u filifiliga e talia lenei ki e tatala ai so’u sa’olotoga i ni faitotoa e lē tatau ona ou oo atu iai ae o lo’u mulimulita’i pea i o’u mātua, o le manuia lea o lo’u olaga o loo o’u faamoemoe atu iai.

E to’a 6 i latou, uso ma tuagane, o le ulumatua o Sia ua mafuta lava ma lona toalua o John ma le fanau ma atina’e lo la aiga, o Nina le isi ona uso o loo galue nei i Darwin, faatasi ma lona tuagane ia Tresh, ae o latou laiti e toatolu o loo mafuta pea ma mātua i Goodna.

Matalena Kathy, brothers, Joseph ma Tresh faapea nephews

Matalena Kathy, brothers, Joseph ma Tresh faapea nephews

O se molimau logomālie na saunoa iai le tamā o Matalena Kathy, le afioga ia Solamalemalo Satai Maiava. Na ia talatalanoa ma faaailoa i le auvalaaulia le la mafutaga mafanafana ma si ona afafine. “O Matalena e lē o se tamaitai e fiafia e tafao pe gaoiā. E faigaluega malosi ma foi mai i le fale. E lē faamisa ae na te faafaileleina fanau a si ona uso matua. E tuu lava i lona loto malie ma le faasoaina o lona totogi mo ia ma le aiga.

Ae na molimau le tina ia Netina, “O se tamaitai e lē iloa pe pa’ia le tino i se fasi auā e agamalu, filemu, tausaafia ma lotoalofa i soo se tagata. O loo faigaluega nei o se Sales Assistant ma a’oa’oina lona faailoga o le Bachelor of Human Services majoring in Counselling i le University of Southern Queensland. O lona faanaunauga ina ia mafai ona fesoasoani i tupulaga talavou a le Pasefika, e ala lea i le faaitiitia o le pule i le ola aemaise le gausia o uiga faailogatagata ma manatu faapito i totonu o siosiomaga ma faalapotopotoga a tagata atumotu.

Na malaga mamao mai le susuga i le faafeagaiga EFKS a Lalomauga i Samoa e ta’ita’ia le sauniga o le 21 o Matalena Kathy Maiava, le susuga ia Rev Sakaio Maiava (uncle). O tuaa o Matalena Kathy Maiava, o si tamā ia Solamalemalo Satai Maiava faapea Netina Maiava (Faleula, Samauga ma Safune).

O le fofoga o le po na malaga mamao mai i Sini o le unlce lava o le tamaitai fai aso fanau, Tuife’ai Alefosio Māteo (Samauga Savaii).  O le faletua ia Ofa Māteo na ia saunia le laei siapo matagofie sa saasaa ai le tamaitai o Matalena faatasi ai ma le faatinoina e si o la alo ia Peta o tu ma aga a le atumotu o Toga e ala i se foai tupe.

Na mamalu ma maualuga le po i le auai o sui o le Divine Mercy a Goodna, faapea le afioga ia Tauiliili Peseta Ata ma le faletua ia Elisapeta Malifa. Na mafai foi ona auai le uncle o si ona tamā ua leva ona faataotolia i gasegase, Maiava ma le faletua ia Lesina ma le nofoaalo faapea le toatele o aiga, uo ma ē masani. Na auai foi nisi faafeagaiga faapea le afioga ia Pei Niko ma le toatele o tupulaga talavou.

Ia manuia tele lou 21 tausaga Matalena Kathy Maiava! Alofaaga mai ou mātua, Solamalemalo Satai ma Netina Maiava, uso ia Sia ma John ma le fanau, Nina ma lana manamea, tuagane ia Tresh ma lana paaga, faapea Joseph ma Tuna, ma aiga uma lava i Samoa, Niu Sila ma Ausetalia.

Matalena Kathy Maiava, Pei Niko Burgess faapea le susuga i le faafeagaiga EFKS mai Lalomauga sa taitaia le sauniga Rev Sakaio Maiava

Matalena Kathy Maiava, Pei Niko Burgess faapea le susuga i le faafeagaiga EFKS mai Lalomauga sa taitaia le sauniga Rev Sakaio Maiava