O loo molimauina pea le faatupulaia o alo ma fanau a Samoa e faamanuiaina i tulaga tau taaloga faavaomalo e lē gata i Niu Sila nei ae faapea foi i le la itu o le vasa Tasemane e pei ona faamaonia mai ai i Ausetalia se tasi o tamafanau a Samoa le atalii ia Asu Johnathan (AJ) Kepaoa, ua sainia e le kalapu lakapi liki a le Sydney Roosters mo le 3 tausaga 2018-2020, ua mafua na ta’ua le upu atalii vae ane paia o le aiga, ona o le tausaga e 2018 na sainia ai le konekarate a Asu ae faatoa 18 ona tausaga.
O le molimau i le olaga o Asu, mai lava i lona laititi, o se tama a le loomatua si ona grandma ia Elena Mulipola ma o le ala foi lea sa masani ona vaaia ai Asu e tali misasa i le tele o Aso Sa ona o anava ia a mātua o mātua, o tamaiti ma fanau ia toaaga i le lotu, pei ona sa vaaia ai le atalii ia Asu i le Ekalesia Katoliko o le Holy Cross i Papatoetoe, tainane i faatasiga a le Ekalesia Katoliko Samoa aoao i Malaeola.
O le olaga taalo o Asu na amata mai le kalapu a Papatoetoe Rugby Union Under 6-Under 8 (2004-2007), sosoo ai ma Papatoetoe Panthers Rugby League Under 9-Under 10 (2008-2010) ona taalo ai lea mo Mt.Wellington Warriors Rugby League Under 11-Under 13 (2011-2013) na taalo mo Akoranga Under 15s for Nationals faapea foi le Ellerslie Eagles Rugby League Under 15 (2013-2014) Akoranga Falcons Under 15s for Nationals, Howick Hornets Rugby League Club Under 16s- Under 17s, Counties Manukau Sting Rays Under 17s for Nationals (2015-2016). O le vai tausaga lava lea 2016-2017, na taalo ai Asu i le Richmond Rugby League i Grey Lynn ma toe filifilia ai foi e le Akoranga Under 17 mo le Nationals…
I le vai tausaga lava foi lea 2015-2017, na sainia ai le konekarate a Asu ma le kalapu liki a le Gold Coast Titans, i se tuutuuga e ao ina aoga i le kolisi a le Katoliko o Scared Heart College i Glendowie, lea sa faapea ona taalo ai o ia i le First XV a Sacred Heart College mo tausaga e tolu (2015-2017), ma sa molimauina ai le tulaga ese o lana taalo, auā o tausaga ia e tolu na oo ai le kolisi o Sacred Heart College i le suega siamupini Grand Finals mo tausaga sosoo e lua, e ui e lei manuia ae o le ausia o le finals a First t XV a Aukilani e se aoga o se tulaga ausia gata.
O le iuga la o le konekarate a Asu ma le Gold Coast Titans i le faaiuga o le 2017, na sainia ai loa le konekarate fou a Asu ma le Sydney Roosters i le faaiuga o le 2017 ma faapea ai loa ona malaga atu o ia ma aumau i Sini i le amataga o le tausaga e 2018, ma taalo ai i le ‘au laititi a le Roosters seia aloaia ona filifilia ai i le ‘au tele a le Roosters mo le taamilosaga o le NRL i le amataga o le tausaga nei pei ona malaga atu ai i Europa Asu (AJ) ma le Sydney Roosters mo ni taaloga faaleuo sa faia i Peretania.
O se fiafiaga i soo se matua pe a manuia taumafaiga a fanau aemaise i tulaga o taaloga faavaomalo, o le molimau foi lea a nai ona mātua, le tamā ia Nunu Faasina Nuuoali Kepaoa mai i afioaga o Asaga ma Vailuutai, ma le tina ia Melesete Mulipola Kepaoa mai Lepea.
E momoli ai le faamalo i mātua aemaise foi o si ona tina matua ia Elena Mulipola ona o le tapu’eina o le olaga o le atalii, le tapuaiga, le faamalosiau, ma le tatalo o loo tulivae ai pea ina ia malutia ma manuia faiva o le atalii. Malo Asu le faaea aiga, faaea nuu, tainane Samoa. O upu a le atunuu.
“Ia pouliuli lou tino ae malamalama ou ala ia tafesilafa’i ou faiva ma ia faamuamua pea le Atua.
