Thomas Mikaele

E mafai ona iloa oe i lau tu, savali ma le tautala. O tupuaga ma le faasinomaga o le tagata e te malaga lava ma oe i taimi uma lava. E tauave mai lava i le amataga e oo atu i le gataaga, lelei pe leaga o lou lava lea faasinomaga.

E lē mafaitaulia le toatele o alo o Samoa ua lauiloa i soo se taaloga aemaise foi le lakapi. Ua ‘ae’ae ai mātua ma aiga i manuia e afua mai ia latou galuega fita, e lē tau fesiligia lena tulaga. 

Ua faapena lagona fiafia o le tamā ia Tuitumua Mikaele Pio ma le faletua ia Tina Mikaele Pio i le taliu mai ina ua mae’a le taaloga a West Tiger ma Manly i le Aso Toonai ua tuanai. Na fesiligia i se tala o le faigamalaga e pei ona malaga atu e maimoa le uluai taaloga a si o la alo ia Thomas Mikaele, lea na taalo ai i lana taaloga muamua i le kalapu a West Tigers. “O le viiga lava o Iesu le agaalofa ua ia tali mai i talosaga e ala i le tuuina atu o le atalii.”

“Ua faafiafiaina i matou i lenei faigamalaga e molimauina le taaloga a Thomas. E moni e lē o le iuga lea, ua tele foi taimi e malaga ai e tapuai taaloga a le atalii ae talu mai lenei tolu tausaga ua molimauina le suiga o le taumafai o le taalo a le atalii.”

“O loo taualo pea le sa o lana malaga faalelakapi, peitai o le faamalosiau e ala i le lagolago, o se lu’itau e atili faamalosia ai le naunau o le atalii i le taaloga ma le tatalo i le Atua ina ia tini manuia lenei faamoemoe e pei foi o isi alo o le atunuu ua oo atu lo latou taumafai i le iuga e gata ai,” o se tali lea a tuaa o Thomas ma lo la agaga fiafia.

O le alii o Thomas Tausilia Mikaele Pio (21 tausga) o se tasi o tamafanau a Samoa o alala i Brisbane na soifua a’e i Niu Sila. E lei umi ona i’u ana a’oga ae o loo finau pea lona soifua taalo. Ua iloga foi ona alu a’e lona taumafai a’o tulai mai i kalapu a a’oga e pei ona iai (junior rugby league) i le kalapu a Goodna Eagles faapea Keebra State Rugby League sa taalo mai ai.

O tuaa o Thomas o si ona o tina o Pio (Amaile & Saleaumua & Vaiee) faapea lona tamā o Tuitumua Mikaele Pio (Faleula & Samusu). Na taunuu mai i Brisbane i le 2005 ona taalo mai ai lea i le 2006 i le kalapu a le Forest Lake, 2007 siitia i Goodna ona taalo lea i le kalapu a Redbank.

O le 2008 – 2016 na taalo ai i le kalapu a Goodna Eagles, a’o a’oga i Kruger Primary School. Na faaauau lana aoga i Keebra Park State School ae o loo taalo lava i le kalapu a Goodna Eagles seia oo ina laalaa lona taumafai agai i luma.

Na avea ma kapeteni i le ‘au a Keebra State School, ma tauavea Kuinsielani (Austalian Schoolboys) i le Under 18 state of Origin. O le vaitaimi o le 2015/16 na laualuga ai le suafa o Mikaele ma ta’uta’ua ai i le itumalo o Ipswich o loo alala ai o se monthly Sportstar i le tele o sini na ia ausia, na avea o se faatumutumuga i lona laasia ma ausia ni faailoga e pei foi ona lauiloa i le avea o ia ma Goodna Eagles Sportsman o le tausaga, e pei ona aave ona tala i upega tafailagi ma se molimau o nai ona mātua.

O le tausaga lava lea na filifilia ai i latou ma nisi o alo Samoa ia Connelly Lemuelu, Liam Pakau, Oscar Tui, Liam Hampson, ma Kelepi Lui a’o avea ai Mikaele ma kapeteni, e taalo i le Wests Tigers Holden Cup squad 2017 season. Na laualuga foi le suafa o Mikaele i na vaitaimi ua lē gata o le Ipswich Junior Sportstar ae o le best forward i le Cyril Connell Cup. A’o taalo Tom i le kalapu a Keebra State High School i Gold Coast sa faafiafiaina le kalapu i lana taalo. Sa avea o se kapeteni i na taimi, sa ausia foi se tama taalo lelei o le tausaga (Sportsman of the year). O le mae’a ai ona ia faafiafiaina ona mātua ma lana kalapu a Keebra State School i ia sini na ausia, ae sainia loa lana konekarate 3 tausaga ma le West Tigers i le 2016. O le a’oga a Keebra State School, na amata filifilia mai ai ma piki mai ai e West Tigers.

A’o aumau i le itumalo o Ipswich, na taumafai pea ina ia taunuu lana miti e ala i le siisii pea o lona tulaga i le lakapi. 

O Mikaele o se talavou e tino itiiti tele i le faatoa taalo mai, e filemu ma tausaafia tele e tagata auā e lē o se tama e mitavale pe pisivale. Sa taalo i le centre ma le wing ae ina ua ia oo atu i le High School na ia manatu ai o le a sui lona tulaga.

Sa iai le taaloga na taalo ai mo Ausetalia i le Under 18, ma o se lu’itau tele mo Mikaele ona o le taaloga faigata na taaalo ai Niu Sila ma Ausetalia a’o ia laeiina le jersey a Ausetalia ae faigata pe a manatu atu i le atunuu na fanau mai ai (Niu Sila) peitai sa finau pea i le ‘au a Ausetalia lea na manumalo ai le ‘au a Ausetalia Under 18 e 30 i le na’o le 6 a Niu Sila.

Mai le taimi na sainia ai le konekarate a Mikaele na siitia atu ma aumau i Sini i le fale sa sailia e le kalapu a le West Tigers. O le tausaga muamua na iai isi alo Samoa na 

o latou nonofo faatasi i le fale e tasi seia oo ina valavala ae o loo faaauau pea lana auaunaga ia West Tigers.

O totonu lava o le tolu tausaga lenei i lana konekarate, na taalo mai i ‘au laiti a West Tigers a’o le 2018 na iloa ai lona igoa i le NRL, peitai o le 2019 ua faamanuiaina e taalo i le ‘au tele lea a West Tigers e pei ona iai le Aso Toonai 18 o Mati 2019. E toatele foi nisi alo Samoa o loo taaalo i le kalapu lea, ma o loo vaaia lo latou foi finau mo le manumalo ma le sini o lo latou taumafai.

O le tausaga nei 2019 e mae’a ai lana konekarate na saini mai i le 2016, ma e lē o mailoa i se taimi o i luma pe toe saini pea ia West Tigers pe o le a faaauau lana taalo i se isi kalapu e fuafua lava ia te ia ma lana pulega.

O le po o le Aso Toonai na tea nei, o le uluai taaloga lea a Mikaele i le ‘au tele a West Tigers i le NRL i le tulaga o le Prob (numera 15) lea na taaalo ai ma manumalo West Tigers 20 i le 6 a Sea Eagles. E tusa ma le 13,159 le aumaimoa sa maimoaina lea taaloga i le maligi o timuga ae sa taumafai pea Mikaele i lana uluai taaloga mo le ‘au tele a West Tigers.