Susuga ia Eric (RH tulimanu taumatau) ma le faletua ia Alisha Pepe faapea le aufaili a le One Sound

Ua atoa nei le 10 tausaga, talu ona tautua mai le faaili a le One Sound Band i lenei aai. Ua avea Kuiniselani ma setete e aumau ai, peitai ua oo atu le tautua i isi setete, isi atunuu e ala i malaga asiasi ma tafaoga.

O le faaili ua igoa o le One Sound ua maoa’e lona tulai mai i le faafiafiaina o soo se augatupulaga aemaise lava i tupulaga talavou i tomai ma agavaa e ala i ituaiga pa’ō o musika, talenia i siufofoga, ma le faaaogāina o mea faifaaili. 

O le susuga ia Eric ma le faletua ia Alisha Pepe o loo lauiloa i lenei faaili ae o le faauluuluga o loo nafa lea ma le afioga ia Masoe Tagaloatea Falemoa o le tuaa o le susuga ia Eric faapea si ona tina o Evelina Pepe mai Neiafu & Asau.

O le tamaitai pese ia Alisha Pepe o le faletua o Eric. O tuaa o Alisha, o Darlene Apulu (Aitutaki, Cook Island) ma lona tamā o Frank Siosiua (Mutalau, Niue).

O le tausaga e 2009 na uluai tatalaina ai le faaili i Logan na faatumulia lea faafiafiaga i lona uluai taimi lea o loo faaauau mai lava i le taimi nei.

Na ta’ua e Eric, i le taimi faatoa amata mai ai, sa o latou galulue faatasi ma nisi sa tautua i nisi faaili, ae o le tuufaatasia ma avea o se aiga e tasi i le taleni, na manatu ai e tatau ma onomea nei tomai pe a aofaatasi i le fausia ai lea o se isi foi pa’ō e sui ai foi le faafofogaaga a tagata i Ausetalia aemaise lava Brisbane, lea o loo tele ina faaauau ai le tautua.

O le tele o atunuu e pei o Niu Sila, Samoa ma Amerika sa femalagaa’i ai Eric ma Alisha, o iina na atili faamalosia ai ma faapupula ai i laua i ni auala lelei e faatuputeleina ai le tomai ma le naunau i le musika. 

E toafitu le aufaaili e aofia ai le susuga ia Eric Pepe (ta piano) le tamaitai pese leo malie ia Alisha Pepe, ma le isi vaega talenia o le aufaaili, Sanele Ah San; Junior Lafu; Kollin Toomata, Jacob Tanoai, ma Damon Sofara Tua.

E alu ma sau aso, ae lē galo ia Eric le tupuaga. “O lenei tomai, o se taleni a le aiga. O le uso ia Esera, cousins Dan Eteru, Donna Eteru, Robbie Seumalii, Charlie Seumalii, Marcus Liufau, na matou amataina se faaili a le matou aiga sa igoa o le TROPICAL BEAT a’o matou i le High School se’i vaganā lo’u uso sa i le Primary School. Sa tele ina faafiafia i meafai a le lotu faapea nisi faamoemoe e pei o aso fanau. E lē mafai ona galo, e manatua pea…”

I totonu o lenei 10 tausaga, e iai faafitauli, lūgā ma lālō ma tauau lava ina a tau matagataga ai fao o le faatuatua peitai, sa onosai ma finau pea, faalagolago i le Atua. 

Na saunoa Eric, “O le tu malosi o le faletua ia Alisha i ona autafa i taimi o faigata, aemaise ni uso lototetele ma le faamalosiau, o se malosiaga o le latou faaili, na faigata ai i le fili ona tineia i lalo le taleni ua avea pea ma mitamitaga o le agaga i taimi uma, e faafetaia ai le Atua.”

E faafiafia le One Sound i soo se faamoemoe lava e aofia ai aso soifua, faaipoipoga, patī a galuega, meafai a ekalesia, ma soo se manaomia lava aemaise o le faafiafiaina o tagata lautele i faaiuga o le vaiaso pe a mālōlō mai galuega. O soo se taimi lava e tātā ai i soo se faamoemoe e tuu uma i ai loto ma agaga o le aufaaili, e faalogoina foi le pepese fiafia o tagata ma sisiva, o le pine faamau lea o le faamalieina o loto i le musika. O le faanaunauga o Eric ma Alisha ia mafai e nai o la alo ona aoaoina ma taofimauina le la taleni aemaise tupulaga uma e fiafia i le musika.

Sa fesiligia Eric ma ia toe faaaopoopo ai e faapea, “E faamalosiau atu ai i soo se tagata aemaise lava alo ma fanau e fiafia i le musika, e moomia le lava o le taimi e faataitai ai (practise) a’o lei faatinoina. O le saunoaga a le manager i taimi uma Masoe Tagaloatea Pepe, ia tele taimi e faataitai ai ma saga faataitai ai (practice makes perfect) o le lelei atoatoa foi lena. 

Ua mae’a ona fuafua nisi o malaga a le One Sound i lenei tausaga i isi setete i Ausetalia faapea foi atunuu i fafo. E faaauau pea lenei tautua i le lotomaulalo, tausaafia, laufofoga fiafia, momoli atu musika e faamalieina ma manaomia e tagata i soo se faamoemoe ae tumau pea le tasi o loto o le aufaaili e pei o le igoa “One Sound”. O le tasi o le leo e afua ai ona tasi loto.