O le taimi o avea le afioga Tauā Fatu Tielu ma Pule sili o le kamupani vaalele o le Polenisia, sa aliali ni feteenaiga ma le Malo ona o le faagaioia o le isi kamupani vaalele tuma‘oti o le Samoa Air, o se meatotino a se alii mai fafo le susuga Chris Langton.
Na oo lava ia feteenaiga i le tumutumu o pulega o le Malo le afioga i le Palemia ma masua mai ai i fafo nisi o aiaiga o fesoasoani a le Malo sa tuuina atu i le Samoa Air, lea sa finau le pule sili o le Polenisia ua faamavae nei, ua lē talafeagai ma le faamuamua a le Malo o le toe faaolaola o le kamupani vaalele a le atunuu ona aafiaga tau tupe sa faaletonu ai i ni tausaga ua mavae.
O lea ua faailoa e le Sui palemia le tofa Fonotoe Nuafesili Pierre Lauofo i le Palemene, o ia foi o le minisita o le Polenisia ua faia le faaiuga e tatau i le Samoa Air ona totogi ana aitalafu e faitau afe o loo nofo aitalafu ai i le Polenisia. E lei faailoaina e le Sui palemia pe fia se aofaiga o tupe o aitalafu ai le kamupani vaalele.
I le atinae o le Polenisia ma ana fuafuaga alualu mamao o lea ua filifilia le Pule Sili fou e pei ona iai se tasi o lipoti a le Samoa Times i sana lomiga ua tuanai e pei ona tofia i ai se tasi o tamafanau a Samoa le susuga Seiuli Alvin Tuala Misi.
O se tasi o fuafuaga a le alii Pule Sili fou ma le komiti faafoe, ua sailia ai se isi vaalele tau lapoa atu mo malaga i le va o Apia ma Pago Pago. O se faaiuga ua faia ina ia maua ai nisi avanoa lelei mo tagata malaga aemaise o uta e felaua‘i. O lea ua taofi malaga a se tasi o vaalele laititi o le Polenisia ae na o le tasi le vaa ua faaaogā, e tālia ai sailiga mo se isi vaalele lapoa e tele nofoa mo pasese.
E lē o iloa poo le ā tonu le ituaiga o lapoa o loo manaomia ai se isi vaalele o le a lisi mai i se kamupani i fafo atu o Samoa. Sa iai le isi vaalele lapoa o le Polenisia e 37 le pasese ae sa aafia foi lea vaalele i ni faaletonu ma toe faia ai le faaiuga a le pulega sa iai ma le komiti faafoe i lea vaitaimi e toe faafoi lea vaalele lapoa ona toe foi ai lava lea i vaalele laiti o le ituaiga Twinotter malaga a le Polenisia i le va o Samoa e lua aemaise o malaga i le va o Upolu ma Savaii.
O le fuafuaga mo le saili o se vaalele lapoa ua lagolagoina e le toatele o tagata malaga ona o vaalele laiti o iai nei e lē gata ina lē lava nofoa ae toatele tagata malaga ae itiiti foi le avanoa mo uta e fia ave.
