O se vaiaso fiafia i totonu o le Pacific Training Institute i le laumua i Ueligitone, le faamanatuina o le gagana Samoa. Aemaise i le vaai atu i le aloalo mai o nai alii ma tamaitai mai isi atunuu o loo aooga ai i le faamanatuina o lea aso.
O le latou auai i le aoaoina o siva ma pese faa-Samoa aemaise o le fiafia i le faiga o tauvaga i le fofo‘eina o fa‘i, vavaluina o talo, ma le valuina foi o le popo na maua ai peepee. O le tamaitai ia Grace To‘o, Timu Iakopo o nisi o faiaoga i totonu o le Pacific Training Institute atoa ai foi ma le lagolago a Fereni Ete, ma i latou uma na auai. E fou foi le vaai a nai papalagi i le vavaluina o talo, le fofo‘eina o fa‘i, aemaise o le valuina o le popo. Ona o le Pacific Training Institute e fefiloi ai aoaoga eseese, o loo faapena ona toatele ma eseese gagana ma aganuu a i latou o loo aooga ai i totonu o lenei aoga.
E eseese aoaoga o loo faia ai. O le computing, job seeking courses, aemaise le Aoga Faafaiaoga o Aoga Amata o le tausaga mulimuli lenei o le latou polokalame ona amataina ai lea i le tausaga fou la latou course fou. E ui lava ina eseese a tatou gagana ma aganuu ae tasi lava i tatou i le silafaga paia a le Atua. O le Susuga ia Mino Cleverly, o ia lea o loo faauluulu i ai lenei polokalame. Fereni Ete o loo faauluulu i ai le Aoga Faafaiaoga o Aoga Amata.
O loo faapea foi ona faiaoga ai le faletua ia Sadie Fiti, o ia foi o le faiaoga o le Aoga Amata i Newtown. Feauai Burgess, o le sooupu a le Aoga Amata i Newtown, Sina Faafia le faletua o le toeaina ia Aufaga Faafia, le faletua ia Segia Alapati o le Supervisor o le Aoga Amata i Pomare.
Grace To‘o ma Timu Iakopo o faiaoga ia Samoa o loo auai i totonu o lenei aoga. O le toatele o faiaoga o papalagi, o Saina, ia e faapena foi ona fefiloai lanu aganuu ma gagana i totonu o lenei aoga i Ueligitone nei.
E moni lava, e ui ina eseese lanu ma gagana, ae tasi lava i tatou uma o fanau i tatou a le Atua. Manuia le feagai ai ma galuega o lenei tausaga.
Faamatalaga na tuuina mai
